【暖男爸爸】《爸爸6》宣傳片曝光 陳小春溫暖讀白感動網民

內地親子綜藝節目《爸爸去哪兒6》有陳小春與囝囝Jasper冧莊拍攝，早前已經與其他親子檔到青藏高原東南部的稻城、寧夏銀川市拍外景。今日《爸爸6》官方微博公佈陳小春父子的海報及宣傳片，海報中陳小春孭起笑得燦爛的Jasper，亦有Jasper掩嘴仔低頭相，相當可愛。

宣傳片內容是陳小春父子到外太空收集小星星，全段配以陳小春的廣東話感人讀白，貼地又真摰，與囝囝的互動更非常溫馨，如幫Jasper著鞋。身為媽媽的應采兒幫忙宣傳外，亦留言：「有點小感動」、「這對Jasper而言不是一個『節目』，而是學習獨立、分享、體驗生活的夏令營」。

陳小春在片中道出為人父親的感悟：「我年輕嘅時候想做大英雄，發誓一世都唔會彎腰，只看前方，從來都唔會留意腳下。直至做咗爸爸之後，我先明白有啲美好係需要低下頭先睇得到。幸福唔係搶返嚟，係收集返嚟，你成日話爸爸係一個英雄，其實爸爸只不過係一個普通人，或者真正嘅英雄就係呢個世界上面嘅小朋友。多謝你畀我知道能夠拯救世界嘅，唔係超能力，而係溫柔同善意；真正嘅勇敢唔係搏殺係守護；真正嘅強大唔係驍勇係溫柔。」令網民大讚感動又窩心。