【梵高爸爸】在職爸爸和全職爸爸的5大分別

2018年1月2日，正式離開全職工作行列，告別打滾了7年的廣告界、返工朝九晚十一，離職時為數碼廣告公司高級客服經理的工作。

以前返工，想有機會hea吓；依家湊BB，有時會懷緬返工的日子。以下係純反映我心聲同真實情況：

在職爸爸和全職爸爸的五大不同之處

1. 返工就算OT，都有放工的時候；照顧BB係無分日夜，要全天候stand by。寶寶一個多月，（純粹）餵奶掃風換片，已經有點吃力，遲啲仲要考慮埋，識轉身時的安全措施、加固食物。半夜瞓到熟睡之際，寶寶喊飲奶，就要用盡力起身沖奶，長期無法深層睡眠，其實體力上都辛苦。嗱…好彩湯丸BB夏天出世，如果冬天要喺暖笠笠被窩起身，仲慘慘豬。

2. 返工對客，都可以憑經驗值、fact-finding，問到客戶的需要或面對的問題，然後提供解決方案；就算再差的客、例如「ASAP類」的，都可以用timeframe壓佢；至於唔知自己要乜的客，都可以俾reference去minimize understanding gap；而賴皮的客就可以email black and white保障自己同公司。但湊B完全唔同，因為你唔知佢喊咩，你會想盡辦法、甚至在網上搵海量資料，都未必搵到solution，有時會好頹。

3. 返工壓力，作為team supervisor，來自續單率、簽單量、點達到合約的預期要求、團隊跟客戶的分歧 （其實我舊公司已經好好，同事夠young夠融洽，老闆對我有要求合理而信任我）；但湊B的壓力，是我好多事未必控制到，亦唔知stakeholder唸咩，甚至婆媳關係（我算幸運，媽媽嫲嫲已經算好少）。以前KPI寫得清清楚楚，但依家無咩KPI可言，有時好無方向。