【龍鳳Babies G & 孖媽Gloria】男士侍產假幾多日先至夠?
2018-08-15
最近男士侍產假話題鬧得熱哄哄,對比法例規定媽媽嘅10週產假,爸爸只得3日,又真係太少。其實媽媽的10週產假,我個人覺得都唔多夠……不過都係講番爸爸先。
究竟BB出世後,爸爸的3日侍產假,要點樣分配?
1. BB出世當日去陪產,迎接BB出世?
2. 接媽媽同BB出院?
3. 出院後第二日去健康院檢查?
4. 同BB拎出世紙?
其實正常順利的順產媽媽,都要住醫院3日2夜;剖腹生產的,最少要住4日3夜。
如果得3日假,爸爸點算好?如果BB唔好彩,有黃疸要成日返健康院檢查、醫院照燈,真係有機會幾日就要去醫院一次,爸爸又點算?又唔好彩,BB唔夠重,出世要留院瞓箱,爸爸又要點做?
可能啲大人會話:「有媽媽嘛,依家又有陪月又有工人,實搞得掂嘅。」但其實男人啊,你先係BB個爸爸、老婆嘅另一半,產婦生產後已經需要好好坐月休息,而且產後情緒不穩,媽媽係好需要老公嘅支持同陪伴。再者,媽媽懷胎十月同BB心連心,母性自懷孕起就已經培養出嚟,但男人做爸爸嘅覺悟,好多時都係BB出世後、有「實物」喺面前,先真正感受到做咗爸爸、負擔重咗,責任重大呢。