【傻夫婦】兩女兒興趣班費用小統計
2015-11-25
其實我一直都好重視小朋友興趣的陪養，不過我又唔覺得自己 “怪獸” 喎！一向都是話女要富養啦！女仔都要見多識廣，第時揀男朋友時，就唔會咁易比人呃吖嘛！哈哈哈！好似係咁講架！
以前古時讚人多才多藝就話 “琴棋書畫” 皆精，咁依家啲小朋友個個學 10樣 8樣，一定唔止 “琴棋書畫” ，不過精唔精就另一回事了。我地這一代小朋友功課咁忙，仲學咁多野，其實有幾多個會學得精，除非有天份，所以我贊成年紀仲細的時候，未有功課壓力，學多幾樣，比小朋友接觸多啲，睇下佢強項弱項，邊方面會比較有天份 (唔一定會有架，我都未發掘到我 2個囡的天份！)，再揀返1-2樣學，會比較實際！
講返2個囡學啲咩？！大頭妹以前得1個，有多啲資源，所以都試得多啲唔同嘅野！佢學過合唱團、溜冰、lego、親子烹飪，依家學梗嘅就有鋼琴、芭蕾舞、畫畫、phonics、數學！小丸子就學過溜冰、lego，依家學梗芭蕾舞同畫畫！
是時候同2個囡計下數，其實條數真是幾驚人！不過有啲一比比幾個月，有啲一個個月比，有啲 auto-pay，分開比又唔覺唔覺囉！每個月都成 $2-3000，加埋之前讀無學劵的幼稚園，又 $3-4000學費，養 2個小朋友供書教學，真是唔只供多層樓架！難怪依家咁多中產話怕生小朋友會影響生活質素，所以選擇唔生小朋友啦！不過有小朋友的快樂，又無野可以取代嘅！
大頭妹：
鋼琴：$640/ 4堂
Phonics：$900/ 4堂
數學：$750/ 4堂
芭蕾舞：$800/ 8堂 (因為要上考試班，一星期跳 2堂)
畫畫：$350/5堂
總數:：$3440
小丸子：
溜冰：650/ 5堂 (剛剛cut咗)
數學：$750/ 4堂
芭蕾舞：$800/ 8堂 (因為要上考試班，一星期跳 2堂)
畫畫：$350/5堂
總數:：$2550 (未cut溜冰)/ $1900
嗱！我真心覺得自己唔怪獸，以上學咁多樣，對依家大頭妹考小學其實都無咩幫助，如果為考小學，應該去學下Cambridge English/ GAPSK/ KPCC個啲讀完有試考，有証書個啲囉！其實學琴都係嘅，不過我好守規矩，5歲先學，依家咩級都無，聽聞有啲小朋友 3歲開始學，5歲已經5級架啦！
係小童群益會學下畫畫，開開心心上堂就 ok啦！
小丸子的比較抽象！不過呢個都是我鍾意呢個畫班的原因，佢地真是教小朋友畫，示範之後再等小朋友自己畫，所以人人出嚟都會有少少唔同，好過一啲幫小朋友起晒草稿嘅，再叫小朋友 “填色”！
學咗大半年啦！終於有自己的琴 (雖然是二手的)，依家屋企有琴，我陪佢練琴的時間少咗，好似有時會甩漏，但我都唔想佢依賴我，我都唔比佢依賴得幾耐，都是時間要自己練啦！
跳芭蕾舞本來是想小丸子學下聽指令，同埋個人有紀律啲，所以出來的結果是本身會聽指令同個人有紀律啲嘅大頭妹做得好啲，不過大頭妹年紀大啲，做得好啲都是應該嘅！
大頭妹數學的進度唔錯，我地唔係要求 K3識乘數啦！雙位加減數做得穩陣已經好開心！
寫數字時小丸子有時會分唔到5同6轉彎的方向！大頭妹細個又無呢個問題喎！
作者： 傻夫婦一家四口生活日誌