【湊仔爸與返工媽】世事未被看透
2018-09-21
在商場吃飯後已很晚,要趕回家沖涼瞓覺。沿扶手電梯落商場大堂,我看見一個危機。
有一個兒童電動車場設置了在商場地下(幾十蚊玩五分鐘那種),而當時已收檔。我想像到若阿豬發現此車場,又會糾纏一番。
「喂唔好俾佢見到唔好俾佢見到,引佢望另一邊!」我按捺住心中的激動,咬牙切齒地低聲跟阿豬爸說。
「呀~豬呀,你睇下嗰邊,有好多波鞋喎……仲有好多波衫……」阿豬爸不惜一切地配合。
行動原本很順利,但阿豬最後還是對運動用品不太感興趣,把頭一轉,就發現了兒童車場。
「嘩!媽咪你睇下!好多小朋友車呀!」阿豬的反應如我所料,到了地下,就興奮地衝向車場。
我正惆悵今次又不知要花多少唇舌才能勸他離開。
「哎呀,收咗嗱。係啦,而家已經好夜啦,冇辦法啦,我地都要返屋企沖涼瞓覺,唯有下次再嚟玩喇。我真係好鐘意玩呢D 車~」阿豬一邊自言自語地說,一邊跟著我們離開。
我跟阿豬爸對望,交換了一個既驚訝又欣慰的眼神。