【小小豬廚房】龍脷葉瘦肉湯

尋日係農莊見到有婆婆擺檔賣龍脷葉，就啲龍脷葉又幾靚，加上小小豬又仲有啲痰同咳，所以就買一份嚟煲俾小小豬飲啦！

其實我之前都試過買龍脷葉嚟煲過涼茶俾小小豬飲，佢都好鐘意飲呀！

原本我都打算照樣煲俾小小豬飲，點知當我俾錢時，那位婆婆話咳嘅時候千萬唔好加蘋果，如果唔係仲咳呀。即時教左我用龍脷葉、南北杏同蜜棗煲豬肉湯，佢話簡單得嚟又有效，好啱小朋友飲。

雖然婆婆講到咁利害，我都有打算跟佢嚟煲。不過…始終都係上網搵下啲資料，咁好似安心啲。原來婆婆教依個湯係民間用作治療傷風咳嘅食療湯，一般傷風咳嗽之外，亦可作為氣管敏感所致之咳嗽，或者作哮喘之一種輔助性食療法。

嘩…講到咁利害，當然要即刻買材料煲啦！

龍脷葉一份$10、豬肉眼瘦肉$30、 蜜棗3個、南北杏少少及薑1片。

龍脷葉、南北杏、蜜棗一齊洗淨，豬肉後洗淨汆水。

煲內放約1L水，然後加入薑片(依個份量約有六碗湯)。

待水滾後將所有材料加入。

水滾後轉用慢火煲約一個半小時。

最後加少少鹽調味，就飲得啦！

雖然只係簡單幾種材料，但又真係估唔到啖湯又幾清甜，飲完喉嚨又幾舒服哦，小小豬又嚟飲左兩大碗呀！

不過，止咳方面又好似未見有太大效用，小小豬都仍然係有啲咳。老公話：唉…神湯咩，飲一碗就好返晒！

咁又係哦，所以等我過多兩日再煲過，煲多…飲多啲…好過食西藥嘛！

作者：小小豬的成長日誌

即Like Oh!爸媽Facebook，登記成為Oh!爸媽會員，緊貼第一手親子資訊。