【小小豬廚房】粟米紅蘿蔔菜乾湯
2016-01-02
早前去南丫島郊遊時，我都買左啲特產返屋企煲湯，我其中一樣戰利品就係菜乾~
菜乾湯其實我都係比較少飲，因為菜乾都係比較寒涼，對於我寒底人嚟講都真係少飲為妙。不過，見到都好似幾靚同埋一包包住比起街市見嘅乾淨好多，都有啲興趣。加上菜乾含粗纖維，對消燥解熱及潤肺都有好處，我又見好耐冇飲，所以都都有啲心思思。
正當我15/16之際，店員姐姐就教我係煲湯時加埋果皮紅棗一齊煲，咁就可以平衡寒熱。
就係咁….我今日就買齊材料，依住店員姐姐教我嘅方法，煲粟米紅蘿蔔菜乾湯啦！
菜乾2棵、豬肉眼約$40、紅蘿蔔1條、粟米1 條、紅棗8粒、 蜜棗5-6 粒及果皮2片~
用清水將菜乾軟洗淨，果皮浸透去囊~
瘦肉洗淨汆水備用~
蜜棗及紅棗洗淨，紅棗記得要先去核呀~