【唯媽】懷孕分享︳QE產檢詳細紀錄
2019-03-21
同上胎一樣，我打算喺QE生BB，所以一知道有咗唯妹，就即時去家庭醫生度驗孕同拎懷孕證明。
現時有3個方法可以向公營醫院登記產檢：
第一：「預約通」應用程式
呢個方法最方便，download個app就得喇！
登記前要確保自己準備好
1. 身份證
2. 醫生出嘅懷孕證明
3. 地址證明
準備好就可以開始登記喇，登記完等大約一星期，就有職員打俾我同我約期喇（等候時間不一，我聽過有媽媽等咗兩星期）。
第二：親身去醫院
如果住喺附近就當然可以親身去啦，記得要帶齊身份證、醫生出嘅懷孕證明同地址證明！
呢個方法最大嘅優點係可以即時約期，好人啲嘅職員仲肯盡量幫你睇吓有冇星期六嘅期添，方便在職媽媽（不過佢哋通常會話只此一次下不為例）。
第三：Fax去醫院
將身份證副本、醫生出嘅懷孕證明及地址證明fax去醫院產科，寫明係作登記產檢之用，記得之後補返個電話問吓收唔收到，職員稍後就會同你約期㗎喇！呢個方法我未試過，不過有媽媽話都好快有人打嚟約期。
我9月用app登記後，10月就第一次去QE見護士。去到日間護理中心四樓（我同唯爸都係非公務員）有護士指示我去量血壓、度高、磅重（全自助式），然後等叫名入去聽講座，講大約當日有咩流程，同喺QE生BB嘅服務。聽完就出返去等叫名見護士。護士會問家族病歷等問題，再幫我約其他期。有位嘅話，即使孕婦唔係有高風險懷孕情況，都會有唐氏篩查及結構期（我係低風險孕婦，好好彩有晒呢兩個期）。
護士仲問我係咪想好似上胎咁入返助產士小組，跟返上胎個助產士。我當然想啦，因為上胎個助產士好好人，會喺成個孕期跟進我嘅情況，如果咁啱我生果日佢要當值，仲有機會幫我接生！不過想還想，都要到幾個月後見醫生，由醫生評估我嘅情況係唔係可以交由助產士跟進。記住如果要病假紙要同護士講，到診紙可以由護士出，但病假紙就要等醫生當值先簽到。見完護士，去二樓抽埋血，再等醫生巡完房簽病假紙就走得喇。
由於我喺私家診所驗nifty pro，所以讓返個期出嚟，冇喺QE做唐氏篩查。
（註：非QE照結構圖）
第二次去醫院就係照結構喇（懷孕大約第21週）。跟返覆診紙上嘅指示，循例上要先去會計部「付款」，但其實係唔使錢嘅。之後就去照喇。有咗上胎嘅經驗，都知道喺QE照結構大概係點，唔會好大期望。照結構由助產士進行，好好彩我兩胎遇到嘅助產士都係好友善同細心嘅，當然唔會好似私家醫生講解得咁詳細，但喺有限嘅時間同好多人等候嘅情況下，已經算照得唔錯喇。我係下午嘅第一個，所以唔使等，而唯妹又好合作，整個過程大約20分鐘就完成。
第三次產檢安排喺大約半個月後，返QE見醫生（懷孕大約第23週）。一去到都係驗小便，量血壓、度高磅重。之後聽護士講座，內容圍繞母乳、入院張卡，同睇返驗血報告。手持張入院卡，孕婦有咩事就可以直接去產房，唔使去急症室排隊。見醫生嘅過程大約係5分鐘，佢摸一摸肚，聽BB心跳，再話俾我知我可以入助產士小組就走得。
距離生唯妹尚有大約10星期，下次再同大家分享其他QE產檢嘅紀錄。
Please like our Facebook Page: https://www.facebook.com/weplaynlearn/
Follow us on Instagram: http://www.instagram.com/kly.chu
作者： 唯媽
相關文章：