【Esther Chu】開學
2019-08-30
今日,我家小學雞第一日返學,家長只係可以送到學校門口,完全唔知啲仔女讀邊一班,好多父母都好茫然,要到接放學先至知個仔讀邊班。
學校有咁嘅安排,原因係想訓練小朋友獨立同主動,俾啲小學生自己去大堂睇吓張notice,搵下自己究竟今年讀邊班,然後去果班度排隊。(當然都會有老師幫手啦)
呢個做法肯定有一定嘅混亂,但係我都覺得幾好喎,可以俾小朋友發揮佢哋嘅主動性,比佢哋知道已經大個仔大個女,要自己搵出對佢哋嘅重要事情,咁做會令佢哋覺得好成長、好自豪。
等到細仔放學返屋企,響佢書包搵到老師張通告,比父母知讀自己個仔讀邊班同埋邊個係班主任……等,當中仲有一個功課嘅溫馨提示:「請讓孩子自行做功課,盡量不要協助他們,更不要改正他們的錯處」
呢個提示,對於我呢類亞媽,當然覺得好正啦!亦都係普遍西方嘅教育價值觀,尤其小學頭幾年,大都重視培養學生對學習嘅主動性,多於功課上的對與錯。(亞洲剛好相反,重視功課的工整完美,並施以壓力要求家長督導學生完成功課。)
我相信愉快學習,意思係當我地面對學習,可以懷住快樂嘅心情,亦為認識咗嘅知識及自己可以完成嘅功課而感到自豪,推動我地愛上學習,咁樣先至係學習嘅意義。
如果一上小學,係咁要迫做功課,係咁要做改正,只會令學生感到壓力,亦會抹煞佢地對學習嘅興趣。
香港嘅教育係好需要革新,光復小朋友嘅求知慾,而唔係做分數及功課嘅奴隸!
唔知幾時香港先可以唔需要付高昂學費而得到尊重孩子嘅教育呢?
作者:Esther Chu
文章獲 我家孩子不上幼稚園 – Go Kids 授權轉載
其他文章: