【Esther Chu】有一種魔法稱為「重視」，只要「重視」事情就有時間發生

我老公成日都講：「你想做嘅嘢，無論幾忙、幾冇時間，你都⼀定會騰空到時間去做！」

換句話講，咪即係價值觀，你睇乜嘢係重要，無論如何都會搵時間做到。例如有啲朋友幾忙都會見、有啲地方幾遠都會去、有啲事幾攰都會做、有啲問題幾困難都會解決……………..只要你覺得值得，無論如何都會去做！

當然，老公呢句說話係針對我講嘅😅 ，因為好多時候，我話我冇時間，果啲嘢我做唔到，又或唔記得咗做，但係佢見我又有時間做其他嘢喎，所以先有感而發…………

老公同我講到明唔係批評，亦唔係指責我冇做或唔記得果啲嘢，佢只不過講事實，每一個人都係咁，佢哋會做同埋記得佢哋最緊張嘅事情。

不過，佢同我咁講嘅時候，都係有點深深不忿，好想反駁。（兩公婆總有呢啲辯論嘅時候😅 ) 但係想深一層，都係有道理嘅，因為我哋嘅思想同時間放響邊度、個心就會響嗰度。跟住個心做嘢，固然有動力。不過作為一個成年人，都要顧全大局，唔係單顧自己認為緊要嘅事，有時亦都要學習捨棄，做啲響家庭成員裏面大家都重視嘅事情，咁樣先係成熟，而唔係自我中心，代表你重視大家多過緊張自己！

就好似上星期，收到細仔學校旅行通知，家長可以同行。其實，平日細仔對於學校嘅通告都唔多放上心，有時問佢係乜嘢嚟，佢都答到我亂晒籠，我要問返佢果班嘅家長group先知係啲乜嘢。

但係，呢個學校旅行通告，細仔就千叮萬囑我要填好交俾班主任，又不停問我會否出席。由於旅行嗰日係平日，我有一個緊要嘅會要開，我十分坦白咁同佢講，真係可能去唔到，要諗一諗，安排一下。

之後，佢日日係咁同我講，你決定好未？你可唔可以同班主任講話你可以去？琴日接細仔放學，佢又第一時間同我講：「我諗到個辦法，不如你同你開會啲人講，你唔得閒開會，因為你要同個仔去學校旅行have fun，然後即刻走？」

我唔知道佢點樣諗咗呢個辦法出嚟？但係一個平日好多嘢都唔記得嘅小朋友，竟然日日響度提我，顯然呢件事對佢非常重要，而我亦應該重視佢重視嘅事情，而重要嘅事情，就算冇時間，都可以騰到時間出嚟去實行，係一種魔法稱為「重視」，只要你「重視」，事情就有時間發生。

多謝細仔，佢先出招，日日使出魔法「Wee Wun Wun」叮醒咗我，令我知道原來佢咁重視我，所以，我都使出魔法，叮啲時間出嚟陪佢去學校旅行have fun !

你呢？你「Wee Wun Wun」咗未？

作者：Esther Chu

其他文章：

【Esther Chu】相處比跑景點重要

【Esther Chu】掛羊頭Happy School 升小一女童因學業壓力濕疹復發