【小小豬廚房】淮山杞子螺頭煲雞湯
2016-02-02
依排天氣凍凍地，最啱緊係飲啲滋補湯。剛好托好友買左啲靚靚螺頭，所以就煲返個淮山杞子螺頭煲雞湯啦~
其實我都真係好少煲雞湯，加啲中藥材都係唔多。我唔係唔想煲，只係小小豬鐘意飲啲雪耳…紅蘿蔔嗰啲湯多啲，所以我就迎合下佢，煲多啲佢鐘意飲嘅湯。
但….啲中藥材湯都有佢嘅好處，就好似淮山係健脾開胃，螺頭有可以滋陰清熱，加埋一齊煲就真係一家大細都啱飲，所以就決定煲下啦！
竹絲雞一隻、瘦肉約$20、乾螺頭約十粒、淮山一両、杞子一湯匙、紅棗六粒、元肉一湯匙、果皮一角~
由於我係用乾螺頭，所以就要浸大約六小時，等佢浸至軟身~
果皮浸透去囊，紅棗切片去核，連同其他藥材浸洗~
