【小小豬廚房】粟米鬚生熟薏米水
2016-02-03
曾經有一次去參觀有機農莊時，小賣部嘅店員教我煲可以清熱嘅新鮮粟米芯水之後，小小豬就愛上左依款涼茶，所以當我行過街市時見到有啲一份份粟米芯鬚時，我都會買一份嚟煲俾小小豬飲，因為依款涼茶係完全唔洗我提，會自動自覺一次飲幾杯呀！
不過依排唔知天氣關係，所以都有一段時間係街市唔見有得買。依個傻豬仔每次同我去街市買餸時，都一定要去之前買過嗰一檔問幾時有買。見到小小豬嗰一份恆心，又真係添加幾分傻氣…哈哈哈。
其實睇見小小豬咁恨飲粟米水嗰個樣，作為MaMi嘅我當然都啲想幫佢實行，不過…..搵左好多地方又確實係買唔到。終於俾我係行果欄時見到粟米鬚，當然咩都唔諗即刻入手，買左一斤返屋企。當我見到嗰一刻真係有一種莫明興奮，我想。。。。我真係變成師奶仔了，$16買到一整天快樂……哈哈哈哈~
原本都只係打算好似之前咁只係加冰糖嚟煲，不過有朋友教我加埋啲生熟薏米一齊煲，因為生熟薏米可以更加清熱毒同埋去濕，對小小豬依排起濕疹都好有幫助。
一聽到對濕疹好就即刻唔諗咁多，煲依個粟米鬚生熟薏米水，因為依排前排天氣乾燥再加上每日都勁開暖爐，所以攪到小小豬啲濕疹又再發作，晚晚都痕醒，好慘慘豬呀！
粟米鬚一斤、生熟薏米約$5、冰糖適量~
左邊細粒啲就係生薏米，右邊大粒啲啲有啲似爆谷就係熟薏米~
首先就將啲粟米鬚洗乾淨~
生熟薏米都浸洗一陣啦~
煲滾水之後放下所有材料，大火滾30分鐘~