【80後手作媽媽】BB唔肯食奶應如何處理？

今日我好想分享一下我餵奶時遇上的問題，話說小Sheryl喺2個月零1個禮拜開始，食奶開始好唔合作，例如經常食幾啖就開始唔肯食，又擰開個頭又推開個樽又喊喊，次次都要同佢戰鬥好耐先至可以完成到一餐奶。佢當時就食緊大約150ML-180ML，每次食奶都食成個幾鐘，甚至試過食2個鐘，真係少啲耐性都唔得。果個時候我就上網研究下又問下朋友點解佢會咁，原來係因為佢過渡緊厭奶期。

有啲BB大約2-4個月會出現厭奶的情況，就係話佢開始睇得清楚周圍嘅事物，所以就產生好奇心，變得唔專心食奶，所以就唔肯食奶，網上就話一般嚟講厭奶期會出現大概2星期，之後就會好番。厭奶期期間，盡可能製造一個安靜的環境俾佢食奶，唔好開電視，唔好有太多人嘢同埋喺佢面前走來走去，讓佢可以專心啲食奶就會好啲。

可惜到咗第3個幾星期，即使食奶時已經好安靜，佢理應好專心，但係佢仍然都係成日扭計唔肯食，而且奶量仲愈食愈少，由原本150ML-180ML變左好多時因係食100ML-130ML，我就開始好擔心，怕佢會跌磅，而且亦都唔明白已經咁耐了，點解佢食奶仲會食成咁… 所以我就打電話去衛生署問下啲姑娘意見。

我將BB嘅情況講俾姑娘知，姑娘亦好細心咁問我好多問題去了解BB嘅狀況，例如係佢食奶的次數、奶量、便便的情況、磅數、會有咩人餵佢、瞓覺情況等等，最後，姑娘問咗我一個問題，就係餵奶時有無「敲樽」嘅習慣，我就話有，其實呢個動作一開始係陪月姨姨教，佢話如果BB停咗唔啜嘅時候，就敲下個樽提佢啜，所以我都有做個呢動作，而且都有教姐姐咁做。而我亦仔細咁諗番，一開始姐姐餵奶都係跟我嘅指示喺佢唔啜嘅時候敲樽提佢，但大概係1個月前，我發現姐姐開始唔係在佢唔啜時敲樽，而係由一開始飲就一直不停敲樽，即使佢啜緊都照係咁敲樽，而我又唔知原本呢個動作係會有Negative feedback，所以都無特別出聲。