【Un太的Blog】我的母乳失敗之路
2020-01-16
今日想同大家分享生完小白白後餵哺母乳的種種經歷，Un太並不是為了跟主流唱反調，反對餵哺母乳，反而是想跟大家分享一個訊息：每位媽媽總有不同的原因而放棄母乳，但她們對孩子的愛並不會因而減退，就算飲奶粉一樣可以好健康，BB一樣可以快樂成長，奶粉定母乳並不代表一切！
(1) 錯誤的開始
Un太是因為入咗產房先發現患妊娠毒血症，最後由醫生決定改為緊急剖腹，產後還被扣在觀察病房24小時由姑娘嚴密觀察；同時又因為白白的羊水混濁，一出世就被送到新生兒加護病房。即係，Un太生完只係見咗白白一眼就俾人抱走咗，再加上當時傷口太痛，用咗36小時先落到牀。白白是未埋過身，完全無飲過黃金初乳！
雖然當Un太成功落牀後，已經好勤力擠奶俾姑娘拎去加護病房，等佢哋餵白白。但是，加護症房餵奶時間有限，而且當時Un太氣促非常嚴重，埋身一直不成功。產後房的姑娘因為Un太沒有BB在身邊，只是簡單教咗點樣用手擠奶。Un太是直至出院當日，向醫生求救後，才成功找到醫院母乳姑娘親自教授，第一次成功埋身….
(2) 產後的憂鬱
回到家後，本來應該開開心心，但Un太因為產後荷爾蒙失調，情緒好差，完全無心情餵人奶。更甚者，當時做了一個好錯好錯好錯的決定：懷孕前本來講好，一生完出院就去找家庭中醫。但結果因為擔心飲中藥餵人奶會影響到BB，而打消了這個念頭。現在想來，真的好後悔當時無好好爭取！因為Un太懷孕時本來就有產前抑鬱的先兆，當時中醫師就已經提醒過Un太，產後都有機會再出現抑鬱問題，建議我及早通知健康院安排輔導！
後來，Un太晚上睡覺會被鬼壓，氣促又持續，忍無可忍下還是去睇中醫。就係咁，拖了足足兩個星期才去找家庭中醫。食了中醫師開的藥兩星期後，情緒平伏番，再沒有被鬼壓過，氣促問題也解決了。可惜，已經停咗餵人奶兩個星期…