【Un太的Blog】致路人甲：媽媽不需要指指點點
2020-01-16
Un太是一名全職媽媽，每日都會帶着白白落街散步，有時候出席Blogger活動，撞正Un生需要上班，都會硬着頭皮一個人帶着白白外出。作為一個帶着小baby兼拖着BB車的媽媽，總會遇上一些蝦碌情境，而且總會遇着一些三姑六婆般的路人甲指指點點……
情境一：
白白當時仲未夠三個月，剛離開餐廳時才餵過奶，沿路走了約15分鐘搭地鐵，剛與朋友分手一進車廂，白白就狂喊。一直喊了20分鐘，整個車廂的眼睛都盯着我們，幾個女士指着我和白白耳語，隠約聽到「唔識湊」、「咁細個帶出街」之類的說話…
講真！有人幫手邊個想咁！BB喊有時真係會無原因！剛吃飽又剛瞓都會喊！BB喊唔係媽媽嘅錯！
情境二：
白白突然在街上喊肚餓，於是我們在商場找了一個坐位，坐下來餵奶。期間，有位女士不斷企圖指導我如何餵奶…「奶樽要拎高啲」、「BB應該瞓低啲」、「唔係BB會成肚風」…
–>其實！我日日都用奶樽餵奶，我都識餵奶架！只係，BB大咗有時會非常好奇同唔專心，唔會好似初生咁肯俾你瞓係度餵！人人都有自己的方法，請不要為我操心！
情境三：
白白大咗對身邊事物日漸好奇，以前用BB車會乖乖180度瞓好，而家大咗乜都想望一餐，要將BB車推到90度俾佢坐直睇嘢。有時候，一個大帶白白外出時佢仲會扭計想抱，連車都唔肯坐！好多時路人甲見BB喊，如果我唔抱起BB又會指指點點….
其實無人想俾BB喊，但一個人又抱B又推車係好難嘅事，萬一BB抱唔穩仲大件事！BB喊一陣唔會出時，但跌落地就實出事！
總而言之，每個媽媽都有自己照顧BB的方法，每位媽媽都會為自己的BB找出最合適的照顧方法。作為旁人，請維護媽媽的尊嚴，不要隨便下判斷、也不要隨便提出意見。請大家記住，如果媽媽需要幫手，我們會提出，如果沒有請不要過分熱心。也請不要評價其他媽媽的行為，因為這是別人的行為，我們沒有資格去批評指教，這是一種尊重。如果真的需要，過來問一句 ：「有沒有需要幫忙？」就已經很足夠！
其他文章：