【Kylife】媽咪二次懷孕20W︳踏入妊娠糖尿臨界點指數，緊急計劃開始！
2020-04-30
今次主要想分享俾各位發覺自己開始踏上妊娠糖尿境界線的孕媽咪，繼上次我照完結構超聲波後，醫生同我講胎水水平比較高，22以上為超標，我當時去到21.7，所以醫生特別叫我留意，而稍後報告到時都要帶返健康院產檢時俾姑娘睇埋。
大家都知如果有妊娠糖尿就要進行甜到傻嘅糖水測試，確認後就要跟足建議餐單進食。而當然最驚演變成妊娠毒血，大大增加分娩風險。所以目前我要訂好自己改善計劃減少患妊娠糖尿的機會！
因為我第一胎無經歷過妊娠糖尿，所以我都上網搵咗一大堆資料，以下可以先分享三個相關網站比大家參考：
就我上網睇既資料，唔一定因為懷孕食多咗高糖份食物而出現妊娠糖尿；有機會因為高齡產婦、家族有糖尿病病歷、肥胖等等因素；而另一種純粹因懷孕，身體荷爾蒙有所改變，引致胰島素出現異常，令孕媽咪身體無辦法好似平時咁盡情消耗食物的糖份，所以血糖先會過高，不過無論邊種大家都要注意返呀！
講開妊娠糖尿就要講GI值，即指食物升糖指數幅度，低GI值食物消化後唔容易令血糖上升；高GI值就啱啱相反，好似我咁踏入臨界點又或者已經有妊娠糖尿嘅孕媽咪可以多選擇GI值低食物，會幫助血糖上升下降幅度較平穏，咁就唔會因為血糖水平升同跌較快而成日想食嘢！
