【禧。熙。之生活點滴】媽媽有話兒 唱歌仔哄睡
2020-05-05
《媽媽有話兒》☺️
唔知有冇媽媽同我一樣,每晚都要唱歌氹小朋友瞓覺? 其實輕快柔和嘅音樂確實係會幫助到小朋友睡眠同增加安全感。 3歲半大嘅禧家姐♀️到而家都係每晚要求媽媽唱歌哄睡,而15個月大嘅肥仔嘜都係用同一個方法幫助入睡。 即係話,我已經每晚唱歌唱足四年零三個月,仲要係兒歌。 試過真係唱到好悶,我就唱吓我偶像LEON 嘅歌啦「是你嗎?手執鮮花的一個,你我曾在夢裏,暗中相約在這夏…..」唱唔夠兩句,家姐就話「媽媽,唔好聽嘅」,又要我唱返「London bridges falling down」。
媽媽真係好矛盾,晚晚唱歌係真係悶嘅,但又怕有一日佢會同我講「媽媽,你唔好唱啦,我自己瞓得架嘞」,到時我應該會好傷心。 其實小朋友真係轉眼間就長大,成長速度驚人,我應該要珍惜。雖然呢四年幾每晚不停起身照顧兩位小朋友真係攰同辛苦,但就係因為呢兩隻小魔怪令到我嘅人生變得豐盛同更堅強,每日都非常充實。 自問做媽媽呢個角色仲有好多不足嘅地方,仍需要繼續學習。好感謝呢兩位小朋友選擇咗我做媽媽,媽媽願意一背子做你哋嘅後盾。
===============================
#姊弟
#hkmum #hkblog #hkparents #parentsblogger #hkmama #mamablogger #mumlife #香港媽媽 #親子好去處 #全職媽媽 #二寶媽媽
作者:禧。熙。之生活點滴
其他文章: