【育兒分享】大寶 VS 二寶 養育大不同︳和牛b的成長日記
2020-05-12
作為一個媽媽，生幾多個小朋友都一樣咁愛佢。
不過，其實照顧大寶同二寶都真係有少少唔同。 好多原因都係因為，唔想令大寶覺得自己被冷落，我好怕和牛B覺得我哋將所有愛、精神同時間花晒去BB到。
所以，同以前完全唔一樣。 就算妹妹喊，會望下咩事唔係濕片、手腳唔係太熱/太凍，唔係肚餓，就會俾佢喊一陣。
仲記得上胎生完和牛B，我成日都會抱實佢唔放。 仲成部手機都會係和牛B嘅相，仲要差唔多張張都一樣樣﹗
今胎手機嘅相無之前咁誇張，唔會每一分每一秒都拎住手機捕住影相。
亦因為都要顧及和牛B嘅感受，今胎比起上胎，無以前咁時時刻刻抱到BB實一實。 所以，要攬不如兩個寶貝一齊攬住啦。
外出方面，以前生完和牛B周圍都唔敢俾和牛B去。 好驚出面細菌多，今胎都唔見得出面無細菌，仲遇上了COVID-19。
不過，最近疫情受控。趁住假期我哋都會駕車去郊外/沙灘俾和牛B放電。
^兩個幾月大嘅BB，初嘗踏沙滋味 和牛B同妹妹好唔同，和牛B細個好扭計，特別係夜晚可以扭足成晚，又喊得好大聲。
相反妹妹好少扭計，喊又喊得好溫柔。
妹妹夜晚亦可以乖乖自己瞓覺，唔需要我攬住瞓覺。
兩姊妹唔同嘅地方，和牛B出世好白淨頭髮好少，而妹妹出世係黑珍珠頭髮都多過家姐好多。
我覺得上天賜咗妹妹俾我哋，真係好好! 和牛B好愛錫妹妹，好照顧妹妹。
妹妹扭計喊，會抱住妹妹叫妹妹唔好喊，安撫妹妹。
和牛B絕對係一個好家姐，有兩個寶貝女我真係好幸福。
————————————————–
作者: 和牛b的成長日記
相關文章：