【產前產後】終於生完BB,痛完可以休息下?

2020-05-19


生完將軍之後,個醫生聯針錯完一次又一次,聯到第三次佢終於完成,我雙腳舉高咗幾個鐘亦終於可以放返落嚟。當時發緊高燒嘅我用盡全身力氣問醫生:
「可唔可以俾杯水我呀?唔該。」
佢話好,轉頭叫姑娘拎俾我。結果……我一等,就等咗兩個鐘……唔好忘記,嗰兩個鐘我身上只穿著紫袍、沒有衣服的、人在發燒,漫長的兩個鐘,產房好凍、生完仔流失咗好多好多血,我覺得自己已經凍到似一條死屍,真心的,我當時覺得自己會慢慢的死去……

點解唔叫救命?陣痛51小時再加生完仔,我真係零力氣了……生過BB的媽媽會懂。

差唔多天光,掃地阿姐入嚟掃地,驚見我就死咁瞓喺度打冷震,問我:「你喺度做咩呀?」
我心諗,你覺得呢?我答:「無人….水…」
好彩佢醒,咁都明我講咩,佢大驚:
「下!佢哋唔記得咗你呀?我幫你叫人嚟。」
跟住好快就有個護士好驚咁衝入嚟推我出去,仲俾咗個電話我打俾老公報平安,老公好擔心問我有無事,佢話佢有問護士點解咁耐都未出返去,護士答佢我聯緊針,一直都聯緊針……(痴線,聯咗4個鐘?!) 

因為我發燒,所以將軍一出世都被我傳染了,佢都發燒,我無望到佢一眼,佢就俾人推咗去BB病房,之前幻想一生完要一家三口合照、BB會瞓喺我心口……全部都無,我連自己個仔咩樣都唔知。

又等咗一個鐘,產後病房終於有位收留我,由於將軍唔係跟喺我身邊,所以我被安排於全房最窄嗰個牀位,窄到點?窄到有人嚟探我係唔能夠企我隔離,只可以企牀尾;窄到連放食物嗰張檯都推唔到埋嚟,我食嘢要捧住食,醫生埋嚟寫報告都要成份托住寫,有醫生因為無位放低份嘢而發脾氣。

入到產後病房,個阿姐幫我過牀之後就走咗,我繼續好凍同發燒,啲血係咁流出嚟,我隻手打咗豆但條死人喉又唔夠長,我伸唔到手去按鐘叫人俾水我,只能夠好細聲咁叫救命、救命……對面牀個媽媽見我好慘就埋嚟問我咩事。

我:「我啱啱生完,而家應該點?」
佢:「下,你衫都未著喎,你著返M巾換返衫先啦。」之後佢就返咗自己牀湊BB。 

熱門文章

【美國專家】過分糾正反依賴父母要陪玩 9大貼士助孩子自己「深度玩」
09-22
【外國研究】父母站着抱起哄 嬰兒會停哭變寧靜 心率明顯減緩
09-25
【準媽媽留意】懷孕各階段感到不適點處理?
11-07
【準媽媽留意】懷孕各階段感到不適點處理?
11-07
【BB便秘】媽媽Carman:囡囡去poopoo谷到肛門出血,心痛又無助!
09-25

【中醫師教路】飲雞湯 補身唔肥身秘訣
2020-09-25
【女性健康】產後子宮下垂療法︳郭志華中醫師
2020-07-16
【產後情緒】「我得了產後憂鬱,是因為太閒的原故嗎?」| 鋅鋰師拔麻
2020-07-03
【產後收身】4孩媽媽肚皮勁鬆被當大肚 兩招天然減肥大法 60日成功收肚
2020-06-27
【醫生分享】巡房常見又難以解釋現象產 媽媽好精神 爸爸竟比產婦仲攰 引發不少網媽共鳴分享照片
2020-05-31
【仙娣小秘密】產後8件事 讓女兒1.5月戒夜奶
2020-04-23
查看更多   ▸