【產房見聞】生仔都有得實習︳詩寧

2020-05-21


一兩星期前,有疑似作動徵狀入咗醫院,入一入去,除咗痛到幾日幾乎行唔到之外,仲好似學到啲嘢。

成日聽到人講生仔要「開度數」,開到十度至生得,但我唔知原來「探宮頸」已經係一件好恐怖嘅事,就係醫護人員會伸隻手入你子宮頸摸吓,睇吓你子宮頸幾長、睇吓摸唔摸到BB個頭,咁你諗吓,隻手係伸到幾入……

我一晚就探咗幾次,探到流晒血,好痛、好痛,行每一步路都好痛,加上懷孕期間本來就有的恥骨痛,幾乎要喺地下爬。

而其實探完頭兩次,都好明顯知道我係未生得,不過姑娘話有咩風吹草動就要通知佢哋,因為佢哋要紀錄低,咁我見啲血量好似多咗,咪通知佢哋囉,以為「紀錄」個意思係寫低就OK,點知姑娘話:「雖然明知係假嘅,但你一陣都係要入產房做詳細檢查。」

我:「又檢?算啦!唔…唔…唔…唔使啦!」
(超驚,驚到口侄)

姑:「唔得。雖然你宮頸真係仲好長。」

結果就被推入產房做詳細檢查,然後更痛更多血,仲要比產房嘅姑娘問我:「都未生得你入嚟做咩?唔使咁緊張架!XXXXXXXXXX」無辜,明明夾硬要我入嚟果個唔係我。

又,我真係入一入院先知道,原來喺你痛到喊痛到嘔痛到瀨屎 〈當晚真係有人邊陣痛邊瀨屎〉嘅時候,姑娘同你講你入得產房,你係要盡九牛二虎之力,親自執你個走佬袋,連一對拖鞋都唔可以留低!我親耳聽到嗰位又喊又瀨屎嘅孕婦苦苦哀求姑娘:「啲嘢擺住喺度先,我生完先拎返得唔得?」

姑娘:「唔得㗎!你一定要拎晒所有嘢走!而且我地唔可以幫你執。你執好叫我地啦。」

孕:「我……真……係……執唔到……」
(佢連講嘢都唔係好講得到)

姑:「執唔到都要執㗎,個個都係咁!你對鞋都要擺埋落嚟呀!我哋唔會幫你睇住啲個人物品㗎,我哋唔負責㗎!」

孕:「我唔介意,由得啲嘢喺度啦……無咗就算。」

姑:「你唔要就出院拎去掉,唔可以就咁放喺度㗎!」

最後當然係孕婦繼續喊、繼續執、繼續痛。我睇到之後就同自己講,只要我一開始痛,就要即刻執嘢,執好嘢先通知姑娘「我痛啊」,一定要喺仲有氣力之前執好對鞋……否則一邊痛一邊仲要比人鬧真係慘上加慘。

文章授權:詩寧@Facebook

熱門文章

【研究證實】DNA早已注定幼兒是否左拗 勿改子女慣用手 增腦部負擔更易攰
06-12
健康須知|常見遺傳病蠶豆症 及早發現防嚴重症狀|慈慧幼苗
06-04
【女兒分享】細妹出世後媽媽超級偏心佢 大咗都仲係咁樣 令到全家人有裂痕
06-12
媽媽分享:以為教仔唔打唔鬧就係完美媽媽 壓力過大終放棄 有時真係忍唔住要鬧 其實發小小火 好過谷住谷住
03-13
媽媽自創Memo紙學習法 隨意作答無限時 為找答案學習更主動
04-24

懷孕分享 | 因肺部感染在廁所突然吐血 懷孕15週台媽:不要小看懷孕的任何一種身體不適
2021-06-04
妊娠併發症|外國媽媽患APAS兩度流產 靠食藥打針控制病情 終誕健康BB
2021-06-01
懷孕心聲│生仔唔係咁簡單~是愛與痛的延續│龍鳳孖媽
2021-05-26
網絡熱話|BB出世變咗粒啫喱 爸爸嚇到唔敢抱
2021-05-20
芬蘭研究|播音樂/聊天能促進BB大腦發育 研究:胎兒在媽媽子宮內已能聽到外界聲音
2021-05-18
新手父母|二寶日記:40w0d等產兆等到心累|阿映的育兒日記
2021-05-13
查看更多   ▸