【產房見聞】生仔都有得實習︳詩寧
2020-05-21
一兩星期前，有疑似作動徵狀入咗醫院，入一入去，除咗痛到幾日幾乎行唔到之外，仲好似學到啲嘢。
成日聽到人講生仔要「開度數」，開到十度至生得，但我唔知原來「探宮頸」已經係一件好恐怖嘅事，就係醫護人員會伸隻手入你子宮頸摸吓，睇吓你子宮頸幾長、睇吓摸唔摸到BB個頭，咁你諗吓，隻手係伸到幾入……
我一晚就探咗幾次，探到流晒血，好痛、好痛，行每一步路都好痛，加上懷孕期間本來就有的恥骨痛，幾乎要喺地下爬。
而其實探完頭兩次，都好明顯知道我係未生得，不過姑娘話有咩風吹草動就要通知佢哋，因為佢哋要紀錄低，咁我見啲血量好似多咗，咪通知佢哋囉，以為「紀錄」個意思係寫低就OK，點知姑娘話：「雖然明知係假嘅，但你一陣都係要入產房做詳細檢查。」
我：「又檢？算啦！唔…唔…唔…唔使啦！」
（超驚，驚到口侄）
姑：「唔得。雖然你宮頸真係仲好長。」
結果就被推入產房做詳細檢查，然後更痛更多血，仲要比產房嘅姑娘問我：「都未生得你入嚟做咩？唔使咁緊張架！XXXXXXXXXX」無辜，明明夾硬要我入嚟果個唔係我。
又，我真係入一入院先知道，原來喺你痛到喊痛到嘔痛到瀨屎 〈當晚真係有人邊陣痛邊瀨屎〉嘅時候，姑娘同你講你入得產房，你係要盡九牛二虎之力，親自執你個走佬袋，連一對拖鞋都唔可以留低！我親耳聽到嗰位又喊又瀨屎嘅孕婦苦苦哀求姑娘：「啲嘢擺住喺度先，我生完先拎返得唔得？」
姑娘：「唔得㗎！你一定要拎晒所有嘢走！而且我地唔可以幫你執。你執好叫我地啦。」
孕：「我……真……係……執唔到……」
（佢連講嘢都唔係好講得到）
姑：「執唔到都要執㗎，個個都係咁！你對鞋都要擺埋落嚟呀！我哋唔會幫你睇住啲個人物品㗎，我哋唔負責㗎！」
孕：「我唔介意，由得啲嘢喺度啦……無咗就算。」
姑：「你唔要就出院拎去掉，唔可以就咁放喺度㗎！」
最後當然係孕婦繼續喊、繼續執、繼續痛。我睇到之後就同自己講，只要我一開始痛，就要即刻執嘢，執好嘢先通知姑娘「我痛啊」，一定要喺仲有氣力之前執好對鞋……否則一邊痛一邊仲要比人鬧真係慘上加慘。
文章授權：詩寧@Facebook