【照結構】媽咪二次懷孕33W︳照結構後發現胎兒腎盂漲大點算好？︳Kylife
2020-06-20
之前我係網上分享BB腎盂漲大問題之後，有唔少準父母都pm我佢哋胎兒都有同樣問題，亦都好擔心後續要點做，所以今次我會分享我兩胎BB都出現腎盂漲大問題同埋之後嘅處理。腎盂漲大簡稱「腎仔大咗」，好多時大家透過20週照結構發現兩邊腎大細不一，多數一邊體積正常，一邊體積明顯大啲。
我第一胎照結構發覺皓皓腎盂漲大，腎大小數字可以比大家參考吓，正常一邊係0.34cm，不正常係0.56cm。當時我哋當然好擔心啦，不過醫生講返20週胎兒器官發展未完善，所以有機會尿液未能順利完全排清，所以要繼續睇住情況而定。
而今次第二胎照結構時，正常一邊係0.29cm，不正常一邊係0.44cm，當時醫生講正常係0.4cm內，所以我哋知道又係同一狀況出現，所以都要再觀察。
由於我登記係威院分娩，所以兩胎我都有同健康院及醫院講返，所以未生BB前佢哋已經安排我係大概三十至三十二週照超聲波同安排醫生講解，其實未生B前照，主要想睇返需唔需要出世後再做檢查。
第一胎醫院照嗰時左右兩邊腎大小大概差四倍，一邊係0.2cm，另一邊係0.88cm。而今胎一邊係0.22cm，另一邊係0.52cm，明顯睇到兩胎既腎盂大小分別。
第一胎皓皓照到腎盂比較分別大，所以佢係出世到宜家兩歲幾後都做咗好多次檢查，由最簡單照肚肚檢查都做咗兩三次，其他就屬於較深入檢查，好似插尿喉放顯影劑照腎超聲波，仲有係血管注入顯影劑做檢查，不過當時皓皓真係太細，以上兩樣過程係好痛苦，聽到佢喊我心都痛埋，不過為咗佢好，所以都無辦法啦..
暫時第二胎喬喬出世後都會有醫院跟進，不過今次應該只會做啲較簡單檢查，相信唔會好似哥哥個時咁恐怖！
皓皓出世到宜家威院一直有follow，去到宜家大概一年一次覆診，整體跟進得好好，所以如果大家胎兒有同樣問題，都可以唔洗太擔心！而準媽咪唔需要自責係自己問題造成，因為依個情況係屬於胎兒自身發展其中一環，而做成腎盂長大，亦唔係由母體造成㗎！！
以上希望幫到各位同樣受胎兒腎盂問題困擾既準父母解難啦！！
懷孕中看到筋肉寶寶的成長，令我更期待二胎BB的加入！
每週小煮意食譜、二寶日常點滴、親子好去處、大家記得要follow呀！
喜歡玩IG的朋友記得Follow：kylife.babies
面書專頁：Kylife與二寶之日常
作者：Kylife
其他文章﹕