【順產預備】媽咪二次懷孕35W︳無得上孕婦減痛班,上網自學減痛法得唔得?!︳Kylife
2020-06-23
大家都知受疫情影響,所以坊間同醫院既孕婦產前班大部分都停曬。今胎我都係威院分娩,原本我好想上由威院助產士教嘅溫柔分娩預備班,因為睇報導見唔少第一胎媽咪上完都覺得好有幫助,唔少產程比世衛標準縮短4小時至大概8個鐘內搞掂,比起我第一胎用咗28個鐘真係差天共地。
不過好可惜宜家無得上,我本身有搵會唔會有人分享上堂內容,不過當然無啦,所以我按佢哋教學內容,自己上網睇吓可以點幫到自己。
首先依個班主張以靜觀訓練,催眠分娩同按摩去減低孕媽咪對分娩既恐懼擔憂,加上生B時面對陣痛會加劇恐怖感,亦會減弱子宮收縮,令產程延長,並產生疼痛,聽落十足十好似我上胎經歷咁! 所以利用靜觀訓練,催眠分娩同按摩,幫孕婦放鬆後,體內釋放止痛、助子宮收縮既荷爾蒙,有助減低生產時間同痛苦!
首先講吓靜觀訓練:對於分娩的壓力同恐懼,有機會令我哋出現唔舒服,好似我就有少少失眠緊張。而靜觀係了解自己出現既即時身體同情緒反應,當下接納情緒,等情緒唔會影響我哋身心再惡化落去,以呼吸或者其他方法將當下注意力放喺自己身上,想了解多啲可以睇以下嘅影片連結。我親身試過靜觀對於日常控制情緒都有幫助,自己更容易察覺情緒上變化,對於教小朋友同其他人相處都有幫助!