【教育本質】起飛│Esther Chu

2020-06-24


好多人對住數學就會頭暈,我兩個仔同我都係呢類人,數學分數永遠都係響低位徘徊。

但係,當我個人大咗,發現原來數學可以用好多唔同嘅方式去學習。我以往讀書嘅時候,老師通常都係得一個方法去解釋,你唔明就係蠢,或者叫你唔好問咁多,背咗條公式就得,所以我對數學從來都冇產生興趣,亦都覺得自己好蠢!

直至到我要教我個仔做功課,我開始對佢啲數學有興趣,可能因為我要明白咗,先至教到佢。而佢本數學教科書啲解釋又非常清楚,而且用各種唔同嘅方法令我可以明白,同我以前返學學嗰啲數學好唔同,原來我適合咁樣學習,咁樣反而吸引我去理解同埋學下點樣解釋俾我個仔知道。

如果睇完都唔明(我數學實在太白痴),我會打電話問功課,問吓啲數學叻嘅朋友解釋俾我知道。呢個過程,令我不知不覺響度自學緊數學,當我唔明嘅時候,我誓要諗通佢,呢個態度同當初返學好唔同,我估如果想當年可以發現呢種學習方式,我啲數學分數應該可以低位反彈。

最近同一個精神心理學家朋友閑聊,佢同我講,每個人嘅思考方式都唔同,有啲人如果你同佢哋講理論,佢哋可以完全唔明,但係如果你用圖像解釋,佢哋就會立即明白。有啲ADHD嘅學生,佢哋需要郁動先至諗到嘢,如果你夾硬要佢坐低,要佢好似其他同學咁樣,佢哋就會好沮喪,反而令佢哋更加集中唔到,咁樣佢哋更加唔明白你想教佢嘅嘢。 

其實每個人都唔同,如果只係使用一種方式教學,咁只係得識得用嗰種方式學習嘅學生能夠明白,咁樣亦代表着只係得果類學生可以成功,其他就好似跌咗落低位,感到好失敗!

呢個道理其實好簡單,如果你有多個一個仔女就會知道,佢哋明白事情嘅方式都好唔同,可能一個需要解釋好清楚,另一個一講就明。又或者一個需要多啲時間自己就會做得到,另一個只要你提佢就會明白。

我細仔協調能力差,亦都係唔係好容易集中嗰種小朋友,所以佢音樂堂打拍子好難打得準,但係佢充滿音樂感。響學期裏面佢嘅音樂評估都係相當麻麻,不過響我眼中,我睇見佢好有音樂天賦,只不過協調唔到肌肉,令佢拿捏唔到。

於是我寫信俾佢嘅音樂老師,解釋俾佢明白我小朋友嘅情況,然後寄咗一段細仔響屋企唱歌嘅短片俾佢。第二日,老師立即回覆,十分讚賞細仔嘅歌藝,佢之前冇察覺得到,當佢而家知道,就可以幫助佢係呢啲方面發揮。

做父母其實最清楚自己嘅仔女,亦都認識佢哋學習嘅方式,我認為我哋應該要多主動同老師溝通,幫助小朋友用最適合佢哋嘅方式去學習,我相信更多學生能夠成功同愛上學習。

而教育嘅本質就係應該讓每一個學生都可以獲得成功!

為人父母都係一樣,養育仔女就好似放風箏咁,你要搵到可以令風箏起飛嘅方向,如果風箏停留響一個位置飛來飛去都飛唔起,而且仲沉落去,咁你就要改變,帶風箏去一個能夠起飛嘅風向,然後放手俾佢可以高飛。

我相信每一隻風箏都可以起飛,只要放風箏嘅人唔執着一定要同其他風箏響同一個位置飛!

大家讓孩子起飛吧!

 

作者:Esther Chu

熱門文章

【親子教養】原生家庭的影響︳何基佑
07-13
【品德教育】學習分享/主動幫助別人 推介4套品德教育短片
07-16
【育兒心得】疫情期間小朋友成日睇電視易變電視精 4大方法減上癮問題
07-11
【教養是咁的】小朋友升K1,仍會摸媽媽胸部,父母應如何着手教性教育?
07-15
【親子關係】「無謂無用」說話背後重要意義︳香港青年協會
07-15

【劇場分享】 屋企最佳女偽人頒獎典禮︳90後在職茶Cha媽
2020-07-16
【斷捨離】搬家︳王思慧
2020-07-15
【父母心聲】忐忑七月︳笨泥爸爸
2020-07-15
【教養是咁的】小朋友升K1,仍會摸媽媽胸部,父母應如何着手教性教育?
2020-07-15
【親子關係】「無謂無用」說話背後重要意義︳香港青年協會
2020-07-15
【提早暑假】突如其來的告別︳Carol Yau
2020-07-13
查看更多   ▸