【分娩準備】生仔除咗走佬袋,仲有咩要準備??︳Kylife

2020-07-04


生仔除咗要準備走佬袋,其實我都仲有啲嘢準備咗㗎,希望都幫到各位特別第一胎的孕媽咪啦!

孕媽咪嘅指甲

依樣係我第一胎經驗,當時我生完去照顧皓皓,指甲唔算剪到好貼,護士個時講咗句「指甲會容易刮到BB皮膚」,所以今胎去到後期,我稍為見指甲長少少就即剪,因為你永遠唔知下一秒會唔會見紅穿水去生仔,到時亦唔會剪埋指甲先入院。

孕媽咪髮型

大部分孕媽咪會剪定短啲頭髮等坐月方便啲,不過有好多都唔係一開始剪定,有啲會等到35週至37週先去剪,不過我就早少少30週剪咗,都係個句啦,如果下一秒就穿水見紅要去生仔,你會好後悔之前無剪。

走佬截的士路線

雖然話有咩緊急事就call白車,不過生仔嘅媽咪絕大部分都會揀call的士!如果咁啱你屋企附近無的士站,搭的士只能用apps或者喺街截的話,咁就一定要諗定係邊個位截!曾經有次我搭唔到巴士去醫院覆診,轉搭的士之際,喺街等咗15分鐘先截到的士,等咁耐係因為啱啱好交更時間,就算的士上無人,見到你截佢都未必會停,所以大家要提前諗好點去最近嘅的士站,又或者邊個位會比較多的士經過。

大家可能會話用apps搵的士或者call其他車仲方便啲,當然都係一個解決方法,不過最驚係司機接咗單同你講佢10至15分鐘之後先到,咁不如直接截的士仲快!

大毛巾及隔尿墊

無論坐咩車去都有機會係車程中途穿胎水,搞到人哋架車濕曬就唔係咁好,所以臨近預產期或者知道BB已落盤既媽咪,可以喺屋企搵定個位放大毛巾同尿墊,要去醫院就一手拎埋去用,唔洗到時再喺走佬袋搵嚟搵去啦!

老公隨身口罩

經過新冠肺炎大家都知帶口罩嘅重要,特別現時老公可以再陪產嘅時候,所以出入醫院最緊要準備定口罩,我嘅走佬袋大概有10個口罩,建議每8小時換一個,預計留3日就有10個。除咗自己,老公嘅口罩都一定要佢隨身袋好,一來唔知幾時生,二來要生個時拎起手用就可以即刻入埋醫院陪產,唔洗煩!

家人隨身拎屋企鎖匙

大家屋企有無啲成日諗住屋企有人,所以就唔拎鎖匙嘅家人。但係孕媽咪接近預產期或者BB已落盤隨時生得嘅時候,都一定叫佢哋隨身袋好鎖匙,因為自己入咗醫院生B未必咁快有機會俾到鎖匙其他家人用,好似現時非常時期,醫院唔俾探病,家人只可拎物資去房門外比醫院姐姐或者姑娘拎入去俾產婦,相信未必可以交換物資,所以鎖匙都係自己袋比較方便啦!

 

以上係我諗到除走佬袋以外嘅準備,大家都可以參考吓睇睇自己啱唔啱用!

懷孕中看到皓皓成長,令我更期待二胎BB的加入!

 

每週小煮意食譜、二寶日常點滴、親子好去處、大家記得要follow呀!

喜歡玩IG的朋友記得Follow:kylife.babies

面書專頁:Kylife與二寶之日常

作者:Kylife

其他文章:
【Kylife】5大方法減低BB便秘機會
【Kylife】流感季節加上九月開學,各位小朋友準備好預防未?簡單5招減低患病機會

熱門文章

孕婦湯水 |中醫師推薦 安胎湯水 (附 孕婦禁忌食物 一覽)
10-11
鼻敏感中西醫各有法 嬰幼兒階段已可預防
11-10
產檢時間表 、產檢流程及檢查項目 (公立醫院 vs 私家醫院)
04-06
【出牙仔喇】8大不適癥狀,新手爸媽知幾多?
10-27
【有10種顏色咁多!】BB便便顏色睇健康
07-30

懷孕│Pregnant belly painting 孕肚彩繪│Yennie Darkins
2021-09-22
優質產前產後護理品牌大獎︱Mama Zone媽媽專屬體驗 享受懷孕每個階段
2021-08-19
影全家福+孕照│Yennie Darkins
2021-07-31
懷孕│公佈~我懷孕了~│Yennie Darkins
2021-07-29
媽媽共鳴|經常去廁所?情緒起伏大? 孕媽媽瞬間有共鳴的26個時刻
2021-06-24
懷孕分享 | 因肺部感染在廁所突然吐血 懷孕15週台媽:不要小看懷孕的任何一種身體不適
2021-06-04
查看更多   ▸