【懷孕心得 】二胎懷孕日記繪本 │安妮媽媽
2020-07-07
畫畫可以放鬆心情，懷有弟弟時就畫了第二本繪本，想隨心記錄一下第二胎孕期的感覺，第時可以回味下。
分享給大家，唔知靚媽們有無同感呢！
親愛的弟弟，這本小畫冊是送你的第一份禮物，和哥哥一樣，想讓你知道你在媽媽的肚子裏時已經被滿滿的愛包圍住慢慢長大，我們都好期待你的到來，要給你一個幸福溫暖的家！
希望你長大後看見這份禮物，會知道你的爸爸媽媽和哥哥是那麼的愛你！
弟弟，你要乖乖在媽媽的肚子裏健康地長大呀！我哋好愛你！
{ 懷孕與經期痛的分別 }
仲記得當初發現懷有二寶時，我以為自己是谷經痛，因為一直以來經期前我都會谷幾日經痛，所以都不以為意。
但以往每次谷痛的時間只得幾分鐘，這次時間明顯比較長和密，而且成個人都好唔舒服又見頭暈，所以決定去睇下醫生。
醫生問晒症，就叫我去驗小便，出到黎等結果果一分鐘真係覺得好漫長又緊張，直到見到第二條線慢慢出現時，真係覺得好驚喜！
因為實在太早期，所以開咗懷孕証明就走得，唔使照超聲波。
所以如果準備懷孕，到接近驗孕的日子時唔好俾假經痛厄到呀！懷孕初期有些人個肚都會悶悶痛架！
{ 懷孕初期要萬分小心 }
懷第二胎同第一胎真係好大分別，忙到好多時都唔記得自己胎住BB，要照顧哥哥，又要陪玩，每日都攰到極點！
無好好休息的情況下，到孕期6週時個肚成日都覺得好痛，保險d我都係去睇下醫生，好彩照超聲波後BB一切正常，排除咗子宮外孕的可能。
醫生吩咐一定要瞓牀好好休息，再痛就要再去睇醫生。
之後屋企人全天候幫手照顧哥哥，俾我可以休息，一個星期後我就已經無再痛了，都安心好多！
{ 最美妙的聲音 }
第一胎懷有哥哥時因為爸爸唔得閒陪我去第一次產檢，所以我記得果次真係好緊張！
今次爸爸終於請到假了，可以拖住手陪我產檢，當醫生俾我哋聽BB的心跳聲時，真係好感動！我覺得係最好聽同最令我安心的聲音！
{ 每天只想訓 }
今胎的反應真係好大，每日都超級超級眼瞓，一瞓落張牀度就好似俾人打暈咗咁！
好彩安排Aidan哥哥返全日班，我平日可以好好留喺屋企休息瞓覺。
{ 孕吐 }
孕期頭3個月，我每日5點後腸胃就超差，好怕聞到d煮餸味，一聞到就想嘔。每晚只食到幾啖白飯，個口苦到想切咗條脷落嚟，輕咗足足10磅。
終於捱過咗頭3個月，我好似番生咁，可以食番我鍾意食的嘢，唔會咁眼瞓，可以陪多d 哥哥玩，希望成個孕期都要順順利利呀！
{ 神隊友爸爸 }
身邊有個幫得手的好隊友真係好重要，可以令我有更多的時間休息安胎。
Aidan真係好鍾意同爸爸玩，可能係由細到大都有陪伴的關係，佢哋的感情真係好好，爸爸都好了解仔仔的需要。
感情係需要從小培養的，陪伴就係給孩子最好的禮物！
{ 你做哥哥喇 }
同Aidan講媽媽的肚子裏有BB，你做哥哥喇！
初頭佢都唔太明白係咩事，但見住我個肚愈來愈大，開始知道有弟弟係裏面，會成日走嚟摸我個肚肚，好可愛！
{ 胎動的感覺 }
今胎唔夠4個月就感覺到胎動，真係比上一胎快好多呀！
{ 親親弟弟 }
哥哥好喜歡錫弟弟，有時玩玩下玩具會跑過來攬下我，之後就錫啖弟弟，媽媽真係覺得好溫馨呢！
相信你會是一個暖男哥哥。
{ 小管家 }
今胎有個小管家哥哥，會每日都提媽媽要食維他命丸，又會問我食咗未！
{ 好哥哥 }
Aidan知道媽媽有BB，唔方便抱佢後，佢就唔會喺街行行吓要求我抱，但就會無時無刻都跑過嚟攬吓我又錫吓我，有時出街仲會幫手拎嘢，怕我太重，真是一個體貼窩心的好哥哥。
{ 吹脹了的大肚子 }
第二胎個肚真係會大得快好多，仲記得上胎差唔多6個月先明顯見肚，但今胎5個月個肚已經大到要用托腹帶。
{ 食極都唔夠 }
至從過咗孕吐期之後，每日都勁好胃口，成日都想食嘢，有時食完正餐又會想食甜品！
{ 功夫小子 }
弟弟，你可以安分一點嗎？可以俾媽媽瞓一覺好的嗎？
二寶真係太活躍，跟本就唔使計胎動的次數，因為佢真係無時停，經常郁經常踢，仲要勁大力！
{ 二寶新衣 }
由於哥哥真係太多衫仔留落嚟，所以我哋都無特登幫弟弟準備新衣。
但弟弟都有好多人錫佢架，姨姨同契媽媽都有買靚靚衫仔俾你呢！
{ 保護自己 }
孕期27週，撞正疫症蔓延，為咗好好保護胎中的小生命，除咗產檢外，我完全唔敢出街，同哥哥一齊留喺屋企玩就最安全！
{ 感謝你的到來 }
弟弟，感謝你平安健康的來到爸爸媽媽的身邊，哥哥也好期待你的出生呀！
從今以後，我哋一家4口就會相親相愛，互相依賴的生活，我哋好愛你呀！
{ 兄弟的愛，17號的約定 }
兩兄弟都是17號出世，好有緣份呀！
最愛的哥哥弟弟，爸爸媽媽會有老的一日，希望係我哋年老的時候，你哋會有兄弟同你作伴，互相扶持，相親相愛！
兄弟姊妹的相伴就是父母送給孩子最好的禮物。
希望大家會喜歡安妮媽媽畫的小繪本啦！
歡迎欣賞第一胎的懷孕繪本
————————————————————
歡迎連絡安妮媽媽：
Facebook專頁： 安妮媽媽親子日記
IG: @Annie_mama_diary | 安妮媽媽親子日記
作者：安妮媽媽親子日記