【生兩個】兄弟姊妹間時常吵鬧，但停課期間卻見姊弟情的珍貴︳龍鳳孖媽

停課停咗七個月， 阿媽本來退咗休， 但喺屋企要做番老師，日日對住兩隻小魔怪 ，真係好辛苦!

但見到佢哋有得一齊玩，唔會咁悶，頓時覺得湊孖寶雖然好辛苦，但停課期間卻見姊弟情的珍貴，辛苦都值得的 。

兩個一齊，有時會玩煮飯仔，一個扮客人，一個扮廚師和侍應；有時會一齊玩媽媽設計嘅學習遊戲，可以玩些二人一組嘅活動；有時佢哋會傾下偈；有時會互相追逐，總之喺屋企都唔會悶。

慶幸佢哋同年紀，玩嘅嘢都一樣，稱得上志同道合……哈哈~

但正因為咁，佢哋小時候需要媽媽嘅照顧方面也會一樣。兩個差唔多時候要飲奶，阿媽要餵邊個先呢？兩個都差唔多時候要瞓覺，兩個一齊逗瞓覺其實都幾難。喺街度兩個一齊扭眼瞓先恐佈﹗細個時推BB車，兩個都要我推，唔通我一個人推兩架bb車咩？最後買咗架孖B車，唔怕爭…哈哈，到再大啲，無用BB車，兩個一齊扭眼瞓時，我手抱一個，另一隻手拖一個，真係無番咁上下臂力和腳力都帶唔到佢哋返屋企。

喺屋企，爭玩具是每日家中之日常吧﹗我平日會用以下方法減少爭玩具﹕

1 分開兩個地盤玩

安排各人一個活動位置。如果要油顏色，分派每人一張枱和一盒顏色筆。

2 分派玩具

二人輪流挑選玩具，各人輪流揀一件直至分完。

3 分派角色

如果要玩煮飯仔，一個扮廚師，一個扮客人。

4 輪流玩玩具

如果兩個都一定要玩同一樣玩具，我會讓他們先猜包剪鎚決定誰先玩，然後輪流。如果兩個都一定要先玩同一樣玩具，我就會收埋，  直至兩人不再爭才拿出來。

當然最好嘅係佢哋會守規自律不爭玩具，但分享係需要時間學習。而且有時媽媽都想唞下，俾佢哋自己玩一陣。

另一方面，佢哋爭玩具除了真係想玩之外，亦出於爭寵和妒忌。佢哋一出世，本來只屬於自己嘅媽媽已經要同人分享，無法獨享媽媽的愛和照顧。

媽媽真係無法好似玩具咁被瓜分，只能在各方面盡量取得平衡。以前我係在職媽媽，早上五時多就要起牀，再加上上班很用神，對我來說，一晚醒來至少四次簡直是一種折磨。所以大寶玥姐便交給工人姐姐照顧。最後令大寶有一段時間好唔開心，冇咗笑容。後來我最後也選擇咗同兩個一齊瞓，縱然很辛苦，但大寶重拾笑面。

至於出街玩方面 ，小時候，我會揹一個出街玩，玩完返屋企放低，再揹另一個出街，分上下半場。試過有次同一日分兩次去海洋公園，叫工人姐姐揹一個到海洋公園交收小朋友…..哈哈…..很搞笑吧!朋友們都話我仲乜要咁辛苦?帶一個出去都累，仲要一日帶兩次。其實小朋友雖小，但佢哋係知道邊個陪佢多D，內心會有比較。時常內心都覺得虧欠了玥姐。當年她每次被工人姐姐帶入睡房也哭得死去活來。所以只要我還有能力，我會盡量花時間陪伴兩寶，不偏心。

湊一個時，媽媽可以全心全意照顧。但有兩個寶寶，不論媽媽給寶寶的精神或時間也會被分薄了。每天花些二人獨處的時間，讓寶寶感受媽媽對他全心全意的愛。不論有多少個寶貝的媽媽，大家也加油!

至於兄弟姊妹們，雖然每日都爭D樣爭果樣，但如果問佢哋無咗家姐/細佬好無?佢哋次次都答唔好呀!我好鍾意家姐/細佬，好鍾意同佢玩。嗱~爭還爭，佢地哋知道兄弟姊妹是爸爸媽媽給佢哋嘅大禮物!陪伴~不論是父母的還是兄弟姊妹的，都是小朋友最珍貴的禮物。

歡迎瀏覽~

facebook專頁:https://www.facebook.com/Miss.swanswan/

ig:little_twin_stars82

作者：龍鳳孖媽