【媽媽心聲】由全職媽媽回復全職上班族初體驗│80後手作媽媽

今日小Sheryl 15個月大了，其實由佢到咗一歲開始，就已經覺得佢唔再係一個BB，已經成為一個小朋友了，佢開始每日會走來走去，會嘗試講嘢去表達佢自己，好似每一日都會學到一樣新嘢，感覺佢哋好似學嘢嘅速度同火箭一樣咁快????

做咗全職媽媽10個月了，終於早2個星期我開始做番全職上班族，返咗2個星期，好想同大家分享一下我嘅改變同感覺。

以前做全職媽媽，每天一早7點左右起身就開始了一天忙碌嘅生活，完全沒有休息的時間，每分每秒都好似趕頭趕命咁，一早要同寶寶刷牙、換片，餵小寶飲奶+食早餐，然後開始準備午餐，當然期間一入廚房小寶就會喊，然後你就要忙於安撫佢同事又要入廚房洗嘢、洗奶樽，然後又要洗衫、晾衫、收衫、摺衫、清潔玩具、地板、換牀單……跟住中午後又要氹寶寶瞓晏覺，等寶寶起咗身之後又要準備下午茶，跟住就要開始準備晚餐，基本上可以話係全日全天候工作，不斷喺屋企行嚟行去， 連自己食飯嘅時間都冇，絕對係一個最好嘅減肥方法????????

早2個禮拜開始，早上幫寶寶換完片食埋早餐之後，我就抱BB去嫲嫲屋企然後就去返工，雖然返工都係有嘢做，但係所做嘅嘢就係對住部電腦做，基本上大部分時間都係坐喺張凳度，用隻手打字用個腦諗嘢，悶起上嚟嘅話間唔時可以同同事傾吓偈，又可以買啲零食喺度，得閒食下，Lunch time準時肯定有得食，又可以同啲同事一齊食傾吓偈，感覺好relax，我覺得比起之前全職媽媽嘅生活，簡直可以話係用「放假」呢兩個字你形容????未做媽媽之前，我都係有全職工作，但係可能當其時我嘅focus係完全在工作上面，所以好多時都會覺得好大精神壓力，覺得好攰好辛苦。但係今日嘅我，可以話個睇法係同以前完全唔同咗，甚至覺得返工生活舒服過做全職媽媽好多倍。由於我屋企冇姐姐，所以星期六日喺屋企嘅時候就繼續扮演返全職媽媽嘅工作，即係全日忙都癲嘅狀態。

寫呢一篇文，除咗想抒發一下之外，其實好想俾多啲人知道做全職媽媽嘅辛勞，特別係好想俾一D仲覺得全職媽媽即係「唔使做」嘅返工一族知道全職媽媽其實係乜嘢嘅一回事，我仲記得初初做全職媽媽嘅時候，總係有啲無知嘅人會走來同你講，你就好啦唔使做，今次呢一篇文，就係好想俾佢哋知道全職媽媽俾你做嘅嘢多好多好多好多好多！

如果你問我，你鍾意邊份工多啲？我會答，我都係喜歡做全職媽媽多啲，因為原來我真係好嚮往同寶寶相處嘅時間，即使佢經常扭計、搞搞震、搞亂檔、整到啲嘢污糟晒，搞到我好忙好忙，但係我都覺得好開心，我覺得我所付出嘅嘢都係值得的，即是係冇錢，只要見到佢笑，見到佢健健康康成長，見到佢學嘢好快，見到佢每一日都有唔同，學到新嘢，我就覺得好感恩，好感激神俾咗一個好有愛嘅屋企我，好感激小Sheryl選擇了我做媽媽，雖然我好想好想繼續做全職媽媽照顧小寶，但係我唔想將搵錢養家嘅責任完全推去爸爸度，我希望如果我仲有能力的話都出力幫忙搵錢，我做嘅一切係要準備寶寶日後讀書需要更多嘅資金，我一定會繼續努力，讓小Sheryl得到快樂嘅童年，努力幫佢走上一條成功嘅路。

寶媽我開咗個新Facebook Page，希望大家支持一下喔! https://www.facebook.com/singchingmama

Follow 我們的Instagram睇更多小Sheryl的生活照啦! https://www.instagram.com/bjbabyhk/

如有任何邀稿或產品試用，歡迎電郵聯絡: bjacchk@gmail.com

作者：80後手作媽媽 – Sing Ching