【荷蘭升學】呠呠開學之荷蘭playgroup係點樣? │港b港媽荷蘭爸爸

2020-09-04


02D6CE40-DF77-4AE0-8851-4791B597FBFA

呠呠開學喇!未足四歲嘅呠呠都仲係返playgroup。但今個學年開始,我哋個城市嘅playgroup 由每次兩個半鐘,轉做每次五個半鐘。雖然由每週兩日減至一日,但父母可以選擇自行付款,如果有位就可以返多一日。我哋好好彩,呠呠可以返兩日,即係一個星期有十一個鐘係十一個鐘自由嘅空氣呀!湊細佬嘅難道指數暫時仲係一粒星,基本上佢係嗰種食飽就自己瞓類型,所以就算湊住一件,行街食飯拍拖都絕對冇問題。

講番荷蘭嘅playgroup先。由於轉咗每次五個半鐘嘅關係,而家嘅playgroup同小學近似,所以變相可以幫呠更容易適應十一月開始嘅小學生活。

043442BA-5314-4694-A50C-2E2881FF84DB

老師要求每個小朋友都帶一套乾淨嘅衫,一條乾淨嘅尿片以防萬一(好多同學其實四歲都未戒片),一個為小息準備嘅水果食物盒,同一個午餐食物盒。老師強烈要求小朋友只可以帶荷蘭傳統午餐,即是麵包,而麵包亦都唔可以搽朱古力醬之類嘅甜嘢(荷蘭好興搽啲牛油再加啲朱古力sprinkle 碎俾小朋友食,叫hagelslag)。當然除咗麵包之外,蔬菜類都完全冇問題。飲品方面, playgroup會提供水或者水果茶。而小學就已經列明只可以帶水返學校,唔可以飲其他飲品。

BA503155-C11A-4E3B-923B-210C060DCA60

Playgroup嘅返學時間係由早上8:15至下午1:35。平日家長係可以陪小朋友上頭15分鐘嘅堂,之後就同小朋友拜拜。但而家由於疫情關係,家長只可以帶小朋友去到學校門口,撳門鐘,然後由老師出嚟接小朋友入去課室。而放學亦都係由老師見到家長後,逐個逐個小朋友帶出學校。呢個疫情接送安排其實同香港嘅幼稚園幾乎一樣。

Playgroup一班大概有16個學生,年齡介乎兩歲半至未到四歲。小朋友自己一到四歲就會直接上小學,所以呠嘅playgroup上下上下就愈來愈少熟悉嘅同學。每班就會有兩個老師。

3EC25CC6-D10B-439D-B4AD-64B5A2F3E7AB

而活動方面,雖然大部分時間都係玩,但而家荷蘭嘅playgroup愈來愈有課程同內容,而老師亦會定期send出教學嘅內容同上堂學嘅歌曲歌詞,等家長係屋企都可以配合教學。室內活動方面主要都係唱歌跳舞,讀故事,畫水彩畫,玩泥膠,同埋任玩玩具。荷蘭教育非常注重室外嘅活動,所以幾乎每日都會出去學校嘅公園活動,講緊係真係公園,每間學校都會有sir滑梯,沙池,吊鋼等嘅遊玩設施。而講緊嘅幾乎每日,當然包括荷蘭最常見嘅下雨天。所以老師都講明返學最好就着水鞋同啲平價衫,因為放學返嚟就一定污糟邋遢。不過呠大人一向有自己襯衫嘅一套,所以一於少理,乜都要粉紅色就得‍。

荷蘭小朋友嘅特色,一定不得不提吊住喺鼻嗰條鼻涕荷蘭嘅老師同家長認為適當嘅細菌同病毒,可以令小朋友更加強壯,所以佢哋唔會睇醫生,就算睇咗醫生都唔會食藥。而果條鼻涕對佢哋來講亦都唔係病,已經係佢哋嘅生活一部分,唔係講笑, 呠嗰班啲同學仔八成都吊住條鼻涕。

而家即使疫情嚴重,學校都只係叫發燒或者咳嗽嘅小朋友唔好返學,提都冇提過條鼻涕哈哈,所以我哋都只能夠提醒呠要勤洗手同埋唔好用手掂眼耳口鼻面。

好多香港嘅朋仔都會問有關口罩嘅問題。呢度係無人戴口罩嘅,學校亦唔建議小朋友戴口罩,認為佢哋唔識妥善處理口罩嘅機會好高,從而增加傳播病毒嘅機會。

4C0B6907-A8E0-4199-8CCB-BB2C575E8E3D

呠有得返學好開心,因為之前疫情我哋自行停學,連暑假,都成四五個月無返學了。而阿媽我同荷蘭爸都好興奮,因為四五個月來第一次呼吸到寧靜同自由嘅空氣,我哋仲襯呠返咗學偷去咗食lunch,大家唔好報串,thanks 哈哈!

作者:港b港媽荷蘭爸爸

熱門文章

英國升學 | 如何準備大學推薦信?(下)| Joyce Wu
10-19
英國升學|Half Term 自有黃金屋|Samuel Chan
10-19
歐洲升學|奧地利教育展|Monica Ng
10-21
歐洲升學|奧地利教育展|Monica Ng
10-21
【國際教育這條路】英國學校學期與假期
01-26

歐洲升學|奧地利教育展|Monica Ng
2021-10-21
部署海外留學|解構英國、愛爾蘭、加拿大升學優勢
2021-10-07
2021最佳留學城市|全球最佳留學城市頭10位 東京蟬聯第一 澳洲3城市上榜
2021-10-05
疫情開學|奧地利入境要求|Monica Ng
2021-09-21
奧地利升學 | JAM Music Lab學士碩士課程 | 章文彬
2021-09-06
維也納升學 | 畢業生的出路 | Monica Ng
2021-09-01
查看更多   ▸