【喬喬妹妹養育記0M】高位穿水!Day2威院15小時生女記│Kylife

2020-09-08


上回講到我37週2感覺到一出力,下身就有水滲出嚟,之後當日我就入咗院檢查,去到第二朝做埋羊水穿破測試,發覺真係穿咗水,所以就更加肯定我唔洗返屋企,要準備打大佬生BB啦!

不過個朝醫院早餐係兩碗麥皮加包餅,我都心感不妙,因為肯定勁快又肚餓!所以喺度建議大家一定要帶嘢食入去,如果咁橋入到去啱啱過埋送餐時間,咁就真係咩都唔使食喇!

食完嘢到10點半,我就過咗待產房等落催生藥,一去到姑娘即刻叫我坐瑜伽波,我都玩咗45分鐘,之後11點半開始落藥,依個時候老公已經入嚟陪產,一開始我哋有傾計,之後護士長講解減痛方法同心情調整等等,咁橋位護士長係我幾年前生皓皓時都幫過我。今次同佢傾完更加明白自己夠放鬆,度數先開得快,所以我今次真係盡量放鬆,接受自己能夠克服既心態去迎接陣痛。

今次我用既減痛方法同次序有音樂、按摩、電掣、暖包,同埋無痛分娩。今次我第一次用按摩同暖包,其實樣樣都分散到我對陣痛嘅注意力,有效減到痛,所以大家有需要都可以要求醫院提供!

今胎零度去一度渡過左超舒適兩個鐘,除咗以上減痛方法舒緩,仲有肚餓感一直影響我陣痛嘅感覺添!之後護士檢查發現我未穿膜,所以要搵醫生人手穿水,穿完度數會開得更快。人手穿水比宮頸檢查更唔舒服,不過都係個句「放鬆先幫到自己!」,穿完陣痛開始加劇,一直去到夜晚八點我眼見開得兩度,而且愈來愈痛,我擔心自己未必可以繼續,所以我即刻要求打無痛。

今次醫院安排好快,我八點半已經落產房打埋無痛針,雖然要等半小時先有效,不過比起我第一胎等牀位加麻醉師等咗兩個鐘已經快好多!

藥效由夜晚九點開始,陣痛由九分減到四分,比起第一胎打完接近完全唔痛嘅分別都好大,所以我要靠深呼吸去減痛,助產士同我講第二胎痛楚更劇烈,所以減咗痛依然會明顯感受到陣痛。打完無痛後我就瞓吓醒吓,到零晨1點我已經開到九度,準備停藥正式Push,之後兩點就生咗喬喬!

總結,興幸我第二胎無第一胎咁辛苦,用嘅時間無咁長,第一胎由穿水陣痛到生用咗二十八個鐘,今胎催生起計用咗十五個鐘,體力上舒服好多。加上今次生B前簡單心態調整,個人都輕鬆咗!

我知好多朋友會話打無痛對身體唔好,但係好似我第一胎勉強忍痛去堅持,有機會令辛苦延長加劇,亦有機會增加BB出世後受感染嘅機會。我第一胎陣痛開始去到四度用咗超過20個鐘.. 如果唔係打咗無痛,我諗我仲有牌痛:助產士講過陣痛愈頻繁愈痛,產婦身心會愈緊張,亦有機會令子宮開度數開得更慢。

另外,當時我老公明確問過姑娘穿水超過24小時仲未生有無問題,當時得到答案係「無問題!」,不過生到出嚟皓皓的確感染指數偏高發咗燒,之後需要食抗生素。所以適時可以考慮係咪要打無痛,令自己可以盡快舒服渡過開度數依個難關,都係對自己同BB嘅一個重要決定!

今次威院二胎分娩安排好唔錯,我諗除咗開刀層面,其餘都好快幫手安排,感覺比三年前更好添,下回分享我係威院產後房嘅經歷!!

每週小煮意食譜分享、一貓二B日常點滴、親子好去處、大家記得要follow呀!

IG:kylife.babies 

Fanpage:Kylife與二寶之日常

Email:Kylife114@gmail.com

作者:Kylife

其他文章﹕

【喬喬妹妹養育記0M】疑似高位穿水!威院生仔記│Kylife

【分娩準備】生仔除咗走佬袋,仲有咩要準備??︳Kylife

熱門文章

【蒙特梭利】6句話令幼兒感受家庭溫暖 蒙特梭利專家:孩子長大更易成功
09-26
【育兒心得】家長式喝令小朋友做事收效微 想子女聽話?4大方法免勞氣
09-26
【育兒心得】子女唔聽話因家長用錯方法表達 9種說話方式助爸媽與子女溝通
09-26
【育兒心得】子女唔聽話因家長用錯方法表達 9種說話方式助爸媽與子女溝通
09-26
【美國專家】過分糾正反依賴父母要陪玩 9大貼士助孩子自己「深度玩」
09-22

【告別小生命】流產父母的支援足夠嗎?
2020-09-22
【媽媽心聲】由全職媽媽回復全職上班族初體驗│80後手作媽媽
2020-08-22
【喬喬妹妹養育記0M】疑似高位穿水!威院生仔記│Kylife
2020-08-16
【媽媽心聲】幸褔背後有多少悲傷?不是每個寶寶也能健康地活到最後... ...│龍鳳孖媽
2020-08-15
【搞笑】假如男人十月懷胎
2020-06-16
【媽咪二次懷孕33W】超級懶人版威院走佬袋list!︳Kylife
2020-06-09
查看更多   ▸