【抵玩兒童節】小童$1坐昂坪360纜車
2016-03-31
想仔女過一個開心嘅兒童節，唔係要買咩禮物，而係要陪佢哋一齊過。一家人去郊外食下嘢影下相，已經可以好Happy。
講抵玩推介去昂坪，因為昂坪360纜車由上個禮拜起推出咗個小童$1坐纜車優惠，大人正價買飛，加多$1就可以帶多個細路坐纜車。一家四口兩大兩細，纜車飛來回原價$560，而家只係需要俾$372，差唔多六五折！所以兒童節未到，唔少家庭已率先坐纜車去昂坪行返轉，順便遊覽埋3個香港之最。
最長的雙纜索纜車
「好開心，好緊張！」6歲嘅黃泳彤小妹妹，有爸媽及嫲嫲陪佢第一次乘坐昂坪360纜車。黃爸爸話，女兒平日功課多，所以特登帶佢去郊外休息下，好開心用$1就可以帶佢坐纜車。泳彤喺車廂入面指住花草樹木同埋山上散步嘅牛，非常興奮。
大人睇慣曬可能唔覺得係咩一回事，但對於小朋友來講，短短25分鐘車程，睇到飛機升降、天壇大佛，甚至北大嶼山郊野公園嘅美景，其實都係新事物，好奇又開心絕對唔難理解。
︿泳彤（右二）暫時放下繁重嘅功課，首次坐纜車表現雀躍。
相關文章：360舞臺：超近距離欣賞刀光劍影
【小小豬】海、陸、空玩盡….360水鄉情懷深度遊