【荷蘭生仔】五大習俗話你知│港b港媽荷蘭爸爸
2020-10-03
生完都兩個幾月，終於有時間講吓荷蘭嘅生仔習俗。
我哋喺香港生嘅，生完12朝就會派薑醋，生完頭一個月就會留喺屋企坐月等等，咁荷蘭又會做啲咩呢？以下落嚟就等呠媽為大家介紹番荷蘭生仔嘅五大習俗。
1. Baargoud 生仔都有金？！
其實即係送禮物，我諗香港人比較熟悉嘅就即係所謂嘅push gift 。Baargoud嘅原意係因為女性懷胎10月生咗BB，而佢哋老公又唔可以做太多來分擔女性嘅辛苦，所以就會送上禮物以作支持。喺以往嘅荷蘭來講，通常都係有錢人先會做呢樣嘢。但係現今荷蘭嘅社會，就平民百姓都會做，而佢哋通常都會送上金戒指，手袋，又或者其他珍貴嘅禮物。呠爸都有送到baargoud 比呠媽架真係夠傳統，做得好哈哈！
2. Geboortekaartjes 生日卡？
喺香港，我哋生咗小朋友好多時都會upload張相上Facebook， Instagram，又或者WhatsApp通知親朋戚友。而荷蘭人就非常之傳統。以前來講佢哋真係會發封信去通知親朋戚友佢哋嘅小朋友出咗世。但係而家我哋就會郵寄(試問住香港嘅大家幾耐無寄過信件先)一張設計精美嘅卡，上面會記錄小朋友嘅全名啦，出身日期時間體重等等。亦都會附上地址同埋你希望對方嚟探你嘅方法，有啲人會搞party，有啲人就會希望對方約咗時間先嚟探訪。呠媽喺預產期之前嘅兩個月，已經預先設計定張卡，喺細佬出世之後幾日，就馬上加埋佢嘅出生日期體重等等，然後一星期內就寄出咗啦。其實都幾佩服荷蘭阿媽們，生完都仲搞咁多嘢，不過開心事係要同人分享嘅。
3. Beschuit met muisjes voor kraamvisite 唔派薑醋派餅？
喺香港生小朋友， 12朝都會派薑醋俾親朋，又或者人哋上嚟探產婦同BB嘅時候就會請佢地食薑醋。咁荷蘭人就梗係唔會食薑醋啦，佢哋會食一隻餅，就係叫做beschuit，而喺beschuit上面就會有muisjes。生男就用藍色muisjes，生女就用粉紅色muisjes。你唔好以為啲muisjes睇落好似普通sprinkles咁，其實佢大有來頭㗎。咁我哋食薑醋就係驅風保身啦，荷蘭人食嘅呢啲muisjes 就可以增加奶量同埋幫助子宮收縮，原因就係muisjes 係由一種叫anise大茴香嘅香草製成。Anise 呢種成分喺好多nursing tea 都揾到架。呠媽食之前都唔知架，唔怪得次次食完都奶量大增啊。
4. Ooievaar in de tuin 花園中嘅一隻鸛
花園中嘅一隻鸛其實係嚟自德國文化嘅。歐州人認為鸛會帶來好運。所以有小朋友出世，佢哋都會喺花園或門前掛上鸛嘅紙牌。而呢個文化之所以流入荷蘭，係因為1909年荷蘭公主Princess Juliana 出世時用過。而時至今日，好多荷蘭人都唔會用鸛咁傳統，取而代之嘅會係其他可愛嘅小動物或圖案。呠媽好實際嘅，生之前兩個月已經設定好可愛嘅動物名牌，最緊要放喺大門口，等送郵件嘅叔叔門手下留情，知道有初生bb，咪大大力㩒我個門鐘。
5. Luiertaart als kraamcadeau 尿片蛋糕做禮物
荷蘭人係好實際嘅民族，好多人探產婦嘅時候都會帶食物去，等佢哋個晚唔洗煮。而送俾bb就會送尿片，而家香港都好流行架，用尿片整成蛋糕，飛機，跑車等。其實真係好實用，不過就記住check 清楚size and brand 雖然有疫情，但呠媽都有收到親友們嘅尿片戰車同蛋糕架。而呠媽嘅幾個好朋友都成日送嘢食嚟我哋屋企接濟我哋架。
作者：港b港媽荷蘭爸爸
其他文章：