【媽媽心聲】產後抑鬱症│龍鳳孖媽
2020-10-05
日本女藝人竹內結子疑因產後抑鬱症而自殺身亡，一代日劇女星曇花萎謝，令人倍感傷心。
根據醫學研究指出，有一半或以上的產婦會受到情緒困擾，而患上產後抑鬱症約有10-15%。每十名產婦便有1至2名患上產後抑鬱症，真的不容忽視！
我就是當中的一位，回想那段經歷真是苦不堪言！我希望在此分享以過來人的經歷，不是想說誰人的不是，只希望能幫助準媽媽預防此可怕的抑鬱症。
產後抑鬱症的出現一般都是由多個因素相互影響而形成。當嬰兒出生後，媽媽的荷爾蒙會有巨大的變化，荷爾蒙會直接影響到大腦控制情緒的部份。除此之外，以下情況亦會增加患上產後抑鬱症的機會：
1)曾經患有精神病，如抑鬱症或焦慮症。
2)有家族成員曾有抑鬱問題。
3)在沒有心理準備下懷孕，如未婚或意外懷孕。
4)懷孕期過程中遇到不幸的事情，如喪親。
5)生產期間發生事故，如難產或新生嬰兒夭折。
6)生活上的轉變，如夫妻關係欠佳、婆媳關係不協調或有家庭經濟問題。
7)缺乏支援、令產婦過分操勞。
8)嬰兒有嚴重先天性疾病或健康問題。
其實我們倆夫婦是有計劃和準備懷孕的，我自己曾因小產而患過輕度的抑鬱症。
最主要令我患上產後抑鬱症的原因是生活上的巨大轉變，相信大部分產婦也經歷過這些轉變。
首先，由未誕下BB前，我們一家人已因由誰來照顧BB和BB出生後是否要跟父母同住而有所分歧。由於當時我是在職媽媽，丈夫的家人想幫忙照顧BB，所以建議我們把BB放在他家人家，放假才接回自己家。當時我極力反對，雖然BB還未出生，但我相信母子相連，而且我想餵哺人奶，分開住根本不太可行。由那時開始，大家的意見已經不合。
到BB出世，感覺一切都來得佷突然！雖然我是剖腹，一早就知道他們在何年何月何日出生，但所有的變化也是不能一下子就能接受，因為所有事情也不是想像般的簡單！
第一，屋企真係好多人!!!
以前，屋企得2個人。自己鍾意做乜都得，去廁所又好，沖涼又好，都唔使鎖門。鍾意喺屋企唱歌跳舞，做乜都唔使理其他人。但由BB未出世前一個月，首先多咗工人姐姐，我開始不能在家中為所慾為。之後孖寶出世，又多咗兩個人，仲有老公家兩老和陪月。屋企突然多咗6個人呀!
第二，寶寶唔至可愛，仲好怪獸！
BB得意就得意，但湊初生是真係好辛苦！未生前，以為湊B都係餵奶和換片，好似兒時玩洋娃娃咁簡單。Oh…No~是我太天真吧！對於新手媽媽來說更是無所適從！BB喊，初時我真係唔知佢喊乜，每次喊都要估下佢做乜，睇下估唔估得中呢！到逗瞓覺先辛苦，抱下搖下，瞓著咗一放落牀又醒。到夜晚，無限輪迴嘅飲奶掃風逗睡和換片，我仲要有兩個一齊同我玩成晚，基本上真係無乜點瞓過覺……嗚嗚~~
第三，自信的工人姐姐
有自信固然是好，但自信到不會聽我的意見時就有點麻煩。其實回想第一個工人姐姐很勤力，又有湊小朋友的經驗。這些方面絶對是一個好工人。但由於她有經驗，所以當我建議用從健康院學到嘅湊BB方法時，她便不會跟從。另外，我當時缺乏餵哺母乳的經驗和知識，不懂埋身又泵奶的次數不多，所以母乳一直不算多。直至有一次去到健康院，姑娘教我正確的哺乳知識，我才懂如何埋身。有一次，細孖感到肚餓，想喝奶，我要求從工人手上接過細孖來埋身，怎料她拒絶，說「你冇奶餵乜野!」。我連想餵奶都被拒絶，想透過埋身來刺激造奶也被拒絶了… …媽媽好像很沒用… …感覺好似仲被工人寸……嗚嗚~~
第四，神隊友變豬隊友
BB未出世前，隊友照顧周到，說話語帶溫柔，亦有求必應。但BB出世後，佢完美演繹咗豬隊友這角色!!!!因為受到產後荷爾蒙的影響，我個人變得很神經緊張，看見甚麼也不順意，但又唔敢出聲。例如，工人姐姐換片後沒洗手就直接去預備炒米茶，每次我見到都十分不開心，但之前已說過，再一次發生時我又不太願意在面前再說(可能受到荷爾蒙的影響)。於是我便跟隊友說，每一次他只會說悔氣說話，「炒咗佢囉」。又好似上面提到工人不給我餵奶，他又為她辨護，說：「佢關心BB咋」。男親友在坐月間經常到訪，跟隊友說，這樣餵人奶不太方便，無論是親餵或泵也不太方便(因初生時要餵和泵得很頻密)。隊友說：「係咪叫佢唔好上嚟呀」。這個時候的隊友只是升級到豬隊友的階段，之後仲會再進化！
第五，湊B意見分歧
由於小朋友是每個母親心中最重要的人，所以每位母親都希望給最好的小朋友。每當遇到關乎BB的事無大小都不會讓步！只是沖涼的水溫已每天也會爭論，我用手肘測溫度；照顧者用手掌。到喝奶我用臉頰測溫度，令願凍多過熱；照顧者用奶嘴滴些奶到手背上，令願熱多過凍。小朋友發燒，我會依醫生指示，過了38度才給藥，照顧者認為37度也要給，連續兩三天用藥。這些都只是芝麻綠豆中的其中一些。各人每天就是為著不同的事堅持己見。跟豬隊友說，他只會說；「可以點呀?」。問番我轉頭添，真係令我招架不住，亦都無嘢同佢講。他正式升級成為「神級豬隊友」！在照顧者的角度想，他們也是把自己認為「最好」的給BB，覺得俾得人湊就唔好咁多意見。到我自己忍唔住出聲時，我又會變成「千古罪人」。
第六，豬隊友壓力大
正因為每日糾纏於這些事情，豬隊友其實壓力亦很大！在隊友的角度，明白太太的意見是對的，但不是說了，他人便會跟從，所以也無能為力。夫妻關係亦都變差，沒有以前般甜蜜，我們也經常為小事(總之是關於BB的事)而吵架。
第七，我的人奶很珍貴，請珍重！
仲有我D人奶呀~我每日都好辛苦泵同半夜起身泵或餵先keep到奶量架！但其他人視之為普通奶，加熱時可能超過了55度或者放咗入玻璃奶樽餵BB，D抗體無晒，咁我仲乜要咁辛苦餵人奶呀??到餵剩咗幾ml，又唔餵埋去，仲話得番少少啫……但滴滴皆辛苦！餵過人奶嘅一定明白。
去到一個位，我每一天放工也站在家門前很害怕走進家裏。世上唯有令我感到幸褔的只有兩隻小魔怪，也是我唯一生存的動力。我也曾經想過了結，但我又很想看著他們長大。
這些生活，還未計算返工真係好辛苦！可能有人會說係人返工都辛苦，但坦白講，好多嘢都係有苦自己知，好難列出晒所有嘢嚟比較。當時份工仲辛苦過做全職媽媽一打二而冇工人，每個月都起碼病一次，發高燒，挨到身體好差。每一日都要五點幾起身，其實夜晚要湊BB，已經冇乜瞓過。每一次出門，又要忍受住BB因唔捨得媽媽呼天搶地嘅哭聲。返工又要好用神，迫自己短時間內盡做。放工又要帶著工作回家，等BB瞓咗繼續做。但有些日子好忙，日日開會，返到屋企BB已瞓咗，可以連續一星期無同BB見面(除了訓著左)。跟住BB又唔親我，不給我餵奶和抱。到半日假，想帶小朋友出街玩，但其他人又覺得咁細個不要周街去，又話會「吹親BB」。我覺得自己好似做乜都係錯咁。
以上嘅經歷相信好多人都經歷相類似的，也可能是準孕婦將要面對嘅事。正所謂「預防勝於治療」，以過來人嘅經驗有以下建議：
一)唔想坐月時一屋都係人，真係要預先溝通好。預先同家人商量好，那些人真的須要留下幫手。至於陪月，我也建議只請熟人介紹的，因請咗了不合心意的，只會令產婦情緒更波動。如果坐月期間真的不想有人探訪，真的要一早說好，以免他人約好來才跟你說，又不好意思推辭。
二)如果是有咗先請工人姐姐，建議最好在生之前三個月到，因跟工人姐姐溝通磨合需時。當時我生前一個月才到，大家也不熟大家的脾性和底線。而且請姐姐的首要條件是聽教聽話，尊重媽媽的意願。
三)如果可以，找一個肯定會接納媽媽意見的照顧者幫忙。如果找不到，建議都係自己湊番。
四)隊友對於突如其來的身份轉換無所適從，但請你永遠也站在媽媽旁給予無限的支持，了解媽媽身心所面對的不是這麼簡單！有你的支持，媽媽才能走過艱辛的每一步！
事過境遷，我和家人現在也活得很好。正所謂「清官難審家庭事」，我不希望這分享會為任何人帶來評擊。
今次分享只想給大家作為借鏡。希望大家能預防產後抑鬱症，避免悲劇的發生。
每個幸褔故事背後，可能也隱藏著無數的悲傷。
請好好珍惜和用心關心為你帶來小寶寶的媽媽！
如果喜歡此分享，歡迎你分享給隊友或家人。
~我是前教師媽媽，喜愛分享育兒教學心得和食玩情報~
~歡迎瀏覽~like and follow~
~Facebook page: https://www.facebook.com/Miss.swanswan/
~Instagram:https://www.instagram.com/little_twin_stars82/
~e-mail~salet1212@gmail.com
作者：龍鳳孖媽
其他文章﹕