【生活趣事】週日的外賣日常│Kidult Daddy毒男爸爸

星期日下午，萬眾期待的午餐，因為是難得的外賣。隨著兩隻馬騮日漸長大，食物要求越來越刁鑽。
　　
和到餐廳不同，大家不需要從餐牌中選擇食物，而是可以就個人喜好任意落單。身為家中御用「Deliver奴」的毒男爸爸，每星期日的例行活動，就是要遊走商場店舖之間，買齊食物。
　　
人字拖配冇袋短褲，一隻手抓實銀包鎖匙，另一雙手，抽住集齊了商場裡面大小字號的外賣，茶記、麥記、大乜乜、大物物，毎樣都係獨當一面嘅 Junk Food。
　　
滿手食物的我，在大廈門口舉起一大抽外賣，示意看更幫忙開門。她慢條斯理地走近，以凌凌漆望住聞西展示「攞你命三千」的眼神，忍笑開門。
　　
返回屋企一開門，幾道飢餓的眼神，興高采烈地歡迎食物（冇錯，唔係歡迎我）。卸下手上的套餐，一人一份地分發，不出所料，細佬見到哥哥的餐，突然轉軚要吃一些，哥哥也願意分享，亦同時話要試吃細佬的份兒。
　　
我提議不如打開全部食物一起分享，卻換回一句：「我們兩個分享得啦」。明顯他們對我盒飯毫無興趣，皆因和閒日的飯餸 Plating 實在太相似。
　　
鑒於疫情關係，我們是有專人（即係又係我）把小朋友的套餐如他們所願分配。最滿足當然是兩隻馬騮，現在他們的午餐，一個包有兩款肉，配上雜錦薯條薯角粟米，再把茶記男人的第二浪漫，火腿煎蛋飯的煎雙蛋，一人一邊據為己有。
　　
雖然最後我身水身汗，吃著薄薄火腿配豉油白飯，但一家同枱的愉快，有講有笑的週日，比午餐本身來得滋味和回味。
　　
上一個星期日，哥哥細佬突然心血來潮，想和爸爸一起去買午餐，於是我們一起經歷了平常週日爸爸的奉餐細節。要清楚去買甚麼食物、掌握各個餐廳位置、因應人流和經驗分析等待時間、以至落單和等候的先後次序，其實有點小學問。尤其多人外賣的時候，有效計劃能使外賣時間起碼減半。
　　
我一邊等外賣，一邊慢慢分享講解。並打趣地提醒他們，不要小看簡單的買外賣任務，因為這和等待用餐那位的 Hangry 指數息息相關。他們清楚 Hungry 和 Angry 的意思，我解釋加起來就是 Hangry，即是「餓到炆」。
　　
當然，當下幾歲的小朋友，只會在意今天的麥記，跟餐的是那一款玩具。
　　
回到大廈的升降機大堂，旁邊企著另一位，手持「攞你命三千」的叔叔，有點焦急地盯著升降機的樓層顯示屏。
　　
細佬好奇：「叔叔趕時間？」
叔叔笑了：「係呀，今日好多人買外賣呀，等咗好耐好耐。」
哥哥插嘴：「係呀，我地都等咗好耐。」
叔叔補充：「你地都快啲返去啦，如果唔係會餓親屋企人㗎。」
　　
短短幾句交流，哥哥細佬若有所思，然後默默走去按了幾次升降機的按鈕。看似他們瞬間明白了，買外賣其實肩負起一種責任感，是為了重要家人去做的。
　　
回到家裡，老婆果然很識做地大讚小朋友，但同時射了個「攪噤耐餓死我啦」的眼神給我。
　　
正當我想送上老婆最愛的齋啡降火的時候，哥哥已搶先一步拿給媽媽，細佬也拿著她喜歡的炒烏冬跟在後面。
　　
站在一旁的毒男爸爸，存在感瞬間變得薄如紙。冇陰功啊～
　　
　　
作者：Kidult Daddy | 毒男爸爸
　　
【個人網誌】
https://www.facebook.com/kidultdaddy/
https://www.kidultdaddy.com/