太太兩周前已簽同意書拒絕急救 林子博喊住提老婆心願:「仔女長大要照顧爸爸」

^強忍淚水 上周五子博接受《頭條日報》訪問時講，到太太好似打定輸數並向他交待身後事，子博一臉無奈，強忍淚水。

昨晨，去年確診罕見癌症「平滑肌肉瘤（腹腔）」的林子博太太董燕君（Shirley）不敵癌魔病逝，子博在社交平台寫下情深字句送別愛妻，一字一淚。早前子博為太太搞網上眾籌幹細胞治療醫藥費，可惜完成4針第一個療程後，對太太效用不大，離世前的肝、腎、肺腫瘤變大，影響排毒功能，出現腹水及水腫等症狀。子博上周接受《頭條日報》訪問時坦言老婆在兩周前已簽同意書拒絕急救(不能康復的僅維生治療)，兼願意捐出眼角膜遺愛人間，子博相當無奈忍唔住流下男兒淚，講到太太心願，子博難過透露，「希望子女長大後要照顧爸爸。」

^掉男兒淚 面對身邊人有重病，愛莫能助，林子博忍唔住流淚。

臨終前董燕君因為嚴重腹水及水腫再次入院抽水，仲要吊蛋白針補充營養，當時子博坦言相當擔心：「其實佢個肺、肝、腎一直都有事，但家嚴重咗，要聞氧氣同埋抽腹水，腹水頂住又痛唔想食嘢，佢一咳，全家好緊張佢，總動員去照顧佢，同佢摸背，畀佢聞氧氣」因為要貼身照顧，所以子博在家不能離開老婆三步以外範圍，亦理解到病人會特別嗲。