【飲品食譜】清肝熱又潤肺 雪梨乾椰片菊花茶 | 小小豬 Kinsey
2020-11-04
為咗慳住啲口罩所以兩母子閉關，今日有返丁點心情同時間，所以就搵下屋企啲存貨，煲番一個清肝熱又潤肺嘅 雪梨乾椰片菊花茶 等我哋三口子齊齊打好個底~
雪梨乾一両、海椰片半両、菊花半両、椰棗四粒~
將所有材料浸洗一陣隔水備用(記得菊花要分開嚟浸洗，因為佢落嘅次序唔同呀)~
煲內放1.5L水，待水滾後加入所有材料(菊花除外)~
待水再次滾後繼續用大火加蓋煲約15分鐘~
之後加入菊花~
再轉慢火加蓋煲20分鐘~
最後熄火焗10分鐘，然後就要即刻夾起啲材料，因為菊花浸得耐，個茶就會帶點點苦~
話咁快就飲得啦~
以下係各食材嘅功效，可以參考一下呀(網上資料)：
雪梨乾 – 具生津潤燥、清熱化痰之功效，雪梨本身屬寒涼之物，但雪梨乾經過烤焗後反而潤而不寒。
海椰片 – 有助清燥熱、止咳潤肺之功效。
菊花茶 – 有清熱解毒，清肝明目功效。
椰棗 – 天然有豐富纖維和營養，可補中益氣、止咳潤肺、補血等。
溫馨提示：
– 由於個別人仕體質不同，所以大家記得煲之前了解下自己，如有疑問，請先向註冊中醫查詢！
作者：小小豬 Kinsey
其他閱讀：