【滋擾行為】為確保嬰孩能在舒適的環境健康成長，我們應如何解決鄰居引致的私人滋擾問題？│蘇文傑律師
2020-12-16
以往天時暑熱，返到屋企第一時間梗係開冷氣，但講到冷氣，唔知道大家有冇經歷過樓上住戶冷氣機滴水嘅問題呢？面對呢種問題你又會點做？冷氣機滴水、鄰居喺屋企或露台吸煙令煙味經常飄到自己屋企同埋噪音滋擾都係常見問題，會干擾其他人正常及合理地使用或享用其物業，因此全屬「私人滋擾」。為咗令BB可以有更加舒適嘅成長環境，我哋可以點樣阻止鄰居再造成以上滋擾行為？
遇到滋擾，其實大家可以透過兩大途徑禁止他人繼續滋擾:
1） 受滋擾者可向相關政府部門投訴，當局會向造成滋擾的人士發出「妨擾事故通知」，但假如情況沒有好轉，滋擾者便觸犯刑事罪行。
– 相關刑事責任：
1.1） 冷氣機滴水問題：冷氣機滴水可引致環境衞生滋擾問題，根據《公眾衞生及市政條例》第132章第12條，任由冷氣機滴水對別人造成滋擾是違法的，最高刑罰是罰款$10,000，加上就妨擾持續每天罰款$200。
1.2）噪音問題：根據《噪音管制條例》第400章第5條，任何人於任何時間在住處或公眾地方因進行以下活動（包括：奏玩或操作任何樂器、錄音機、收音機或電視機，擴音裝置，進行消遣活動，經營生意或操作任何空氣調節或通風系統）而發出煩擾噪音，可以罰款$10,000。
1.3）鄰居在露台吸煙：雖然沒有相關法例禁止此類滋擾，但住戶可提出民事訴訟以追討賠償或禁止他繼續進行滋擾。
2）如上述所言，物業持有人（如業主）或佔用人（如租客）有權提出民事訴訟，受滋擾人士可根據實際損失追討賠償，也可以申請禁制令禁止他人繼續滋擾，假如索償金額不超過$50000，可以透過小額錢債審裁處追討。
建議： 假如真係受到鄰居嘅滋擾，其實第一步可以先向管理處反映問題，或嘗試自行與鄰居協議，咁樣更能夠直接處理問題，同時維持良好嘅鄰里關係。如果情況冇改善，先考慮透過以上嘅兩大途徑解決滋擾問題以及追討賠償。
作者：蘇文傑律師
其他文章：