【移民生活】美國學校假期0功課 仲送埋玩具board game 移民美國港媽Vikey Chen:work hard,play hard

2021-01-04


從囡囡2歲起,我哋每年都來美國玩。數下手指,呢3年去過十幾個州。但係呢個冬天,略有不同。我哋一家三口,搬到美國已經大半年,所以係囡囡嘅,第一個美國winter break。

爲期3個星期嘅winter break,真係想點玩就點玩。因爲疫情,我哋唔想住酒店,所以用幾個day trip取而代之。又因爲要保持社交距離,冇咗big gathering,變成幾個小型traditional Christmas dinner。一餐變幾餐,small talk變deep discussion,其實更加有意義。

我香港啲老友一聽,都大叫難以置信,個個都問同一個問題:咁多時間玩,佢啲功課係咪好少?

放假應該閱讀同旅遊

其實,囡囡啲功課唔係少,而係完全「冇功課」。假期冇功課,係一個美國傳統。Work hard,play hard。學校叫大家,趁假期好好放鬆,同親戚朋友聚下。如果功課纏身,如何玩得盡興?回想我哋細個嗰陣,每逢假期,唔單止有功課,仲趁機俾多啲,整個double俾你嘆下,5份變10份,10份變20份。仲怕你玩創個心,冇心機讀書,所以假期結束,一返學就小測。

美國學校鼓勵學生,利用長假期,「讀萬卷書」同埋「行萬里路」。佢哋認爲「讀萬卷書」好重要,因爲閱讀能力係終身學習嘅基礎。所以如果你,可以喺呢3個星期,有12日完成每日15分鐘嘅閱讀,就可以額外參加多一個STEM project。另外,佢哋認爲「行萬里路」同樣重要,遊山玩水,可以比做功課更增長知識。因爲要成爲global citizen,你唔可以只守住眼前嘅一寸方土。雖然疫情關係,去唔到好遠,但係近有近玩。我喺香港嘅老友,就同阿仔去咗跨年露營。我相信山上只有3度嘅寒冷,頭頂嘅一片星海,手中嘅嗰杯熱朱古力,將成爲阿仔最暖嘅記憶。

玩具同桌遊可以寓教於樂

另外,學校唔單止冇功課,放假之前,仲有好多唔同嘅玩具同桌遊送俾每一位同學。我冇諗過,呢啲看似簡單嘅玩具遊戲,竟然好玩到大人都樂在其中。寓教於樂,老師高招而且用心。其中一款桌遊叫Farkle,簡單嘅6粒骰、1張紙、1支筆。好玩之餘,亦可以練記憶、膽量、計數、同邏輯分析。仲有一個玩具,係好多人嘅童年回憶,就係飲可樂換返嚟嘅「扭計蛇」。囡囡一拎起,就愛不釋手,去邊度都帶著條蛇。隨意扭動,用創意去構建各種造型,充滿變化同驚喜。

我記得,一年前囡囡正值K2,當時我哋仲喺香港。有次去食嘢,隔離枱有個年齡相仿嘅細路。囡囡行過去,搵佢玩。個媽咪話,阿仔做緊功課啊。囡囡瞪大眼問,乜叫功課?因爲囡囡所讀嘅一條龍國際學校,幼稚園階段冇功課。校長話,最好嘅功課係父母嘅陪伴,例如一齊睇下書,去公園玩,煮下嘢食都得。我有個老友笑稱,囡囡以前喺香港,就好似生活喺個bubble,冇做大多數細路做嘅嘢。我話,如果bubble之外,充滿荒誕,我情願盡力守護呢個bubble,力求不破。

音樂與文字都有無窮魔力,總能觸及心底最柔軟之處。值此新年之際,我想將李宗盛嘅一曲「希望」送俾所有父母。2021,一齊work hard,play hard。

「總在她們的身上看到自己過去的模樣,對自己、對人生、對未來的渴望……如果能夠陪著她們一起成長,生命裏就算失去一些別的又怎麼樣……但願我能給她一個最像天堂的地方,我生命裏美好的一切願與她們分享。 」

作者:陳曉瑋 Vikey Chen

作者為「香港Vikey移民美國」版主,媒體稱為:女創業家、港產師奶。其產品和言論獲得「紐約時報」等國際主流媒體報導。現居美國,分享中外教育、生活、及生意場文化異同。

熱門文章

SEN與視覺感知障礙│小朋友為甚麼會反轉寫字?│Jeff Tang 眼科視光師
02-12
外傭問題|工人姐姐整爆電飯煲問應否買個新的 張敬軒:估唔到最先頂唔住嘅竟然唔係我
02-23
拆解疫下患病3大無奈位
02-26
【移民英國  如何避免全球徵稅?】律師教用信託    善用免稅額    避未知稅項
08-20
【鏡面字】寫字調轉左右甚至反轉?認識SEN學童被忽略的學習視覺問題︳Jeff Tang 眼科視光師
01-12

ohpamafile_cat

查看更多   ▸
移民英國|BNO移民英國正式接受申請 住屋/求職/搵學校 移英前9項準備
2021-02-03
【移民話題】海外匯款概覽:本港銀行轉賬比較+3大網上匯款平台
2021-02-02
英國移民 | GP、A&E、視像門診有甚麼分別? 英國醫療系統9大須知
2021-02-01
外交部宣布1月31日起 不再承認BNO護照為有效證件
2021-01-29
BNO「5+1」後日接受網上申請 下月23日起可用手機app掃描護照申請簽證
2021-01-29
【移居英國】移民英國開銀行戶口 有住址證明最重要
2021-01-28
查看更多   ▸