【怪獸家長】小朋友向診所內眾人揮手 唯獨一位女士沒回應 媽媽怒斥：冇仔生懶有寶

小朋友周圍和其他人打招呼，別人不回應就是打擊小朋友自信的行為嗎？Facebook專頁 診所低能奇觀 的診所助護珍寶豬姑娘日前分享了一宗在診所內發生的小故事，當媽媽帶小朋友到診所看病時，小朋友不停向診所內的人打招呼，但唯獨一位女士沒有回應小朋友，媽媽認為這位女士沒禮貌，更怒斥她打擊小朋友自信，最後兩人互相對罵……

詳文如下：

有日一位媽媽抱住個小朋友嚟到診所。
佢登記後坐低，小朋友就周圍望，望望吓，小朋友向診所內嘅人揮手。
有幾位見到小朋友咁都揮手或『hello』回應，有位女士就由頭到尾都冇望過小朋友，唔理佢。
小朋友仍然向住女士方向揮手，揮手再揮手。

媽媽就同小朋友講：「唔好再同呢個阿姨say hello啦，佢冇禮貌呀」
媽媽再講：「小朋友say咗咁耐hello一啲反應都冇，冇禮貌」
唔知究竟係『阿姨』定『冇禮貌』觸動到女士嘅神經。
女士抬頭望住媽媽問：「你話我呀？」
媽媽都唔輸氣勢：「呢度係得你咁對我個仔啫」
女士：「佢同我揮手我一定要應㗎咩？」
媽媽：「呢個年紀嘅小朋友係好需要身邊嘅人俾反應佢㗎，如果唔係會打擊到佢㗎，你係大人就唔應該咁囉」
媽媽再同小朋友講：「阿姨冇禮貌呀唔應你，你唔好學佢咁喎，人哋同你say hello你一定要應，咁先有禮貌呀」
女士：「我阿媽教我唔好同陌生人講嘢㗎喎」
媽媽：「我個仔邊係啲咩陌生人呀？」
唔係喎，女士同你個仔冇親又唔識嘅，計落又真係好似係陌生人喎。
媽媽再講：「你冇禮貌就冇禮貌啦！慌死你唔係冇仔生心理變態呀？」

咁又講得過份咗喎。做咩而家鬧人咁鍾意話人冇仔生㗎？生唔生仔係個人選擇嚟啫。

女士：「所以你教你個仔同個心理變態say hello？」
媽媽：「廢事同你講呀！冇仔生懶有寶」
女士已經冇理佢，媽媽一直條氣好唔順咁久唔久就會望一望女士。
現場氣氛一直僵到大家都唔敢出聲。
睇個醫生啫，唔好咁啦好冇呀？

不少網民都不齒這個媽媽的做法，留言說：「人哋唔應你個仔啫，唔使話人無仔生咁毒呀」、「去得診所，通常都係唔舒服，唔係應該教小朋友所有嘢都唔係必然架咩？」、「媽媽嘅身教對小朋友嘅影響應該大過亞姨嘅反應囉」。

文章授權：診所低能奇觀