禁航令│假若航班臨時取消 我地應該點做？│蘇文傑律師
2021-01-23
新型冠狀病毒肆虐全球，唔單止香港嘅第四波疫情持續蔓延，唔少歐洲國家單日亦錄得有過萬人確診，英國更出現變種病毒，面對咁失控嘅冠狀病毒，除咗實行嘅嚴格防疫隔離措施，有部分國家更實施禁航令，例如：香港政府早前公佈禁止英航營運嘅客機喺12月12日至25日期間由英國倫敦抵港。
雖然因為疫情嘅關係，大家都儘量減少外遊，但有D人可能因為工作或留學等原因，要搭飛機出入境。疫情之下，每日都可能會有唔同嘅變數，假如大家面對航班突然取消或延誤，究竟應該點向航空公司以及酒店索償呢？
航班取消或延期
假如航班因疫情被取消或延期，乘客應即時聯絡航空公司，根據《航空運輸條例》第500章，航空公司須就乘客因航空運輸過程的延滯而造成的損害，作出相應嘅賠償，但亦要視乎個別情況而定，大家可以參考早前同航空公司簽定嘅合約或條款，當中會列明唔同情況下嘅賠償安排。而喺酒店方面，如果大家係透過酒店官方網站預訂，就應該即時聯絡酒店，查詢酒店嘅退改政策，每間酒店都會有唔同安排，以洲際酒店為例，酒店列明「由即日起至2020年6月30日入住的新預訂（包括預付房價預訂），可於入住前24小時內免費更改或取消」。假如大家係透過其他非酒店官方嘅第三方平台預訂，例如Hotels.com,Trip.com,Airbnb等，就可以聯絡佢地嘅客戶服務詢問，但如果第三方平台未能提供全額退款，大家就可以向旅遊保險公司索償，但要留意保單嘅條款，因為有唔少保險公司都唔會保障「因爆發廣泛性傳染病導致的航班取消」，大家應自行聯絡保險公司。
航空公司突然倒閉
喺疫情下，航空業發展前景變得好唔穩定，大部分航空公司都大受影響，有唔少更先後宣佈倒閉，假如乘客係直接透過航空公司購買機票，咁就應該即時聯絡該公司追討賠償，如果係透過旅行社買機票，根據《旅行代理商條例》，顧客可以根據旅行社安排及清盤程序索償，最多可獲達9成嘅賠償，但如果未能透過以上途徑索償，就要經保險公司獲得賠償，不過要留意嘅係，每間保險公司嘅相關條款都唔同，受保範圍亦會有出入。
如果大家真係不幸遇到以上嘅問題，記得要準備好航空公司延誤證明 ，當中包括航班嘅信息、原定起飛時間、實際起飛時間以及屬於受保範圍內嘅延誤原因。不過疫情下，大家都應該盡量留喺屋企，避免外遊，咁先可以減少染病風險！
作者：蘇文傑律師
其他文章：