【湯水食譜】生津潤肺 ! 蘋果雪梨乾桔餅茶 | 小小豬
2021-01-29
依排真係乾到爆，家中兩位老細成日都話周身痕，再加上天氣轉嚟轉去搞到氣管敏感喉嚨痕痕，都係時候要做吓嘢。
見屋企有雪梨乾同桔餅，咁就再買埋蘋果，煲番一個化痰止咳、生津潤肺嘅蘋果雪梨乾桔餅茶，咁就嚟三口子潤一潤啦~
桔餅兩個、蘋果三個、雪梨乾約兩両、無花果四粒、南杏一及陳皮一角~
蘋果洗淨去核及切粗粒(記得要係洗蘋果前用刀刮了一圈，刮走面嗰一層果蠟)~
陳皮用水浸至軟身，然後刮囊~
雪梨乾、南杏及無花果浸洗一陣~
桔餅洗淨然後切塊~
煲內放1L水，然後加入陳皮~
待水滾後就可以加入其他材料~
待滾起後，繼續用大火加蓋煲約15分鐘~
之後轉慢火加蓋煲多1小時~
最後熄火再焗多大約5分鐘，咁就可以飲得啦~
其實桔餅、蘋果同雪梨乾依個配搭我分別都有煲過，不過三樣加埋一齊煲都係第一次，但煲出嚟個味我覺得就係咁多次係最好飲，飲落甜甜地又帶少少桔餅嘅鹹，依一煲茶唔使一晚就俾我哋KO晒啦！
以下係各食材嘅功效，可以參考一下呀(網上資料)：
– 桔餅 – 有理氣、化痰、止咳功效，含豐富維生素A和C，對風寒咳嗽，氣管敏感，支氣管炎皆有紓緩作用，健胃助消化，潤肺和預防哮喘。
-蘋果 – 有生津止渴、潤肺除煩、健脾益胃、養心益氣、潤腸、止瀉、解暑、醒酒等功效。對兒童生長發育有益，能促進生長及發育。
雪梨乾 – 有止咳化痰、潤肺、生津潤燥及清熱功效。雪梨本身屬寒涼之物，但雪梨乾經過烤焗後反而潤而不寒，比較適合小朋友及老人家。
-無花果 – 以潤肺利咽、理氣祛痰、改善偏熱的口乾、喉嚨痛、開胃止瀉及潤腸通便等多個功效。
-南杏 – 潤肺、止咳及平喘，亦可生津開胃。
-陳皮 – 有通氣健脾，消滯健胃的功能。
溫馨提示：
– 由於個別人仕體質不同，所以大家記得煲之前了解下自己，如有疑問，請先向註冊中醫查詢！
作者：小小豬Kinsey
其他文章：