一人湊四個無難度| 工作近10年絕頂好姐姐將遠嫁到美國 港媽不捨仍祝福：要快快樂樂做個少奶奶
2021-06-12
近日港媽 Chloe 在 Facebook 群組《香港僱主討論區》發文表揚工作近十年的外傭姐姐 Joy 耐心湊她4名孩子 ，惟姐姐半年後不再續約，將會嫁到美國。雖然 Chloe 相當不捨 Joy ，但亦祝福她到美國開心幸福，快快樂樂做個少奶奶。
Chloe 回覆《Oh!爸媽》指，誕下第二胎後就聘請Joy ，一做就做了10年。「當時係朋友個姐姐嘅細妹嚟，第一份工就係幫我，一做就做咗5張約。」對於Joy 的第一印象，Chloe 坦言是乖和善良。雖然她沒有相關工作經驗，但 Chloe覺得她猶如白紙一張，純潔且易教；加上她的姊姊在朋友家工作表現良好，對 Joy 充滿信心，便決定聘請她。
過去的10年間，Chloe增添2名孩子，現時孩子分別是10歲、9歲、5歲和2歲，Joy變相要幫忙湊四個孩子。不過她不捨Joy辛苦，所以年半前請多一名外傭姐姐 Nana幫忙。Joy煮飯味道雖一般，卻勝在湊小朋友很有耐性，4名小朋友都很喜歡黏着她。 Joy 也會自費買生日禮物送給他們、聖誕節會扮聖誕老人放禮物在孩子牀邊、用自己錢買零食給孩子吃，還花時間在網上看食譜煮特別菜式。
^ Chloe 與另一位姐姐 Nana （右）談好會續約。
港媽Chloe：要將心比己當佢屋企人
家中有多一位姐姐，無疑可分擔工作量。但週末只能安排一位放假，所以姐姐們有時要在家湊4個孩子。上周六Chloe 剛巧有事不在家，從攝影機看到Joy一邊抱着她女兒，一邊處理其他家務。Chloe 立刻覺得她仍然很有心機照顧孩子，坦言既感動又安慰。
然而遇上好姐姐並非必然，所以Chloe認為，要「將心比己當佢屋企人，互相尊重」。之前 Joy回鄉時，Chloe 特別買些禮物送給她的家人，特別是她兒子。「同媽媽分開好慘，所以我會買文具玩具零食俾佢。」
可惜Joy姐姐半年後不再續約，因為她將遠嫁到美國。Chloe 表示，「雖然我超級唔想佢走，但我當佢係家人，見佢有更美好前程，我應該祝福佢。至於長服，佢唔做本身係無得攞，但因為佢實在做得太好，過去10年唔使我煩惱，所以我會獎勵筆錢俾佢做嫁妝。祝福姐姐去到美國開心幸福，快快樂樂做個少奶奶。」
^Joy陪伴 Chloe 4名孩子長大，所以當每次提起姐姐要離開，他們都會哭成淚人。
^Chloe 都有開設個人專頁《超人媽媽》分享四個孩子的生活點滴
《超人媽媽》Facebook專頁：https://www.facebook.com/4BoMa
撰文：李穎彤
照片由受訪者提供