被網民批自私決定繼續治療令悅悅受苦 媽媽：佢一日未離開我都相信佢會想繼續堅持

剛出生便患有壞死性腸炎的1歲早產BB悅悅，經歷4次手術後情況反覆，媽媽昨晚（8/7）發文指，悅悅情況突然緊急轉差，醫生表示未必能捱到。惟有網民覺得悅悅父母自私，不肯放手令囡囡痛苦，晚上媽媽再痛心發文回應。

內容如下：

「我哋為悅悅設立呢個page除咗係想為悅悅集氣，為咗令更多人了解呢種病之餘當初都想他日如果悅悅康復後，有一個專頁用嚟紀念當初悅悅有幾犀利，過五關斬六將咁去捱過…

我知道將呢件事放喺社交平台上一定會有唔同嘅聲音，世事無絕對嘅對與錯，你唔踏出嗰一步打開度門，你永遠唔會知門後迎接你嘅會係一條咩路，悅悅仲未離開，我哋唔知聽日或之後會發生咩事，會唔會有奇蹟好番？

假設如果當初我哋因為第一次發生發炎情況就已經選擇唔做手術俾悅悅離開，咁係咪代表住我哋唔自私？係一個好大愛好為小朋友著想嘅家長？又假設如果我決定俾悅悅機會一次又一次咁捱過，最後好番，將來嘅生活係多姿多彩，咁你又會唔會覺得我當初嘅決定係自私？

所以你哋可以持相反既意見，但唔代表你/我嘅決定係一定啱，亦唔代表任何人係自私嘅表現，雖然悅悅情況唔樂觀，但佢一日未離開我都相信佢會想繼續堅持，我哋同醫生都有共識唔會希望悅悅好辛苦咁堅持，盡量都俾佢舒服，呢個係我哋同醫生達成嘅共識。

病冇人會想，成功嘅過程係好辛苦，我嘅睇法係如果未盡力就已經放棄，你嘅人生真係好可悲，悅悅係我嘅小朋友，我都希望可悅同可納會學識堅持兩個字，結果成功與否都唔重要，重要嘅係過程中盡咗力，堅持過就夠..

多謝你哋嘅關注同支持，亦都多謝話我哋自私嘅人，因為我知你都係心痛悅悅嘅人。」

網民紛紛送上鼓勵，並指悅悅父母不必理會別人的說話，珍惜與悅悅相處的分秒！媽媽回覆指，「知道，我哋依家都係醫院外等緊姑娘俾我哋入去。」