【呀劍萬帥】元朗 流浮山 下白泥

2016-04-26


今日本來真係冇諗住去邊,但係到咗下晝個心唔甘心就咁虚渡咗個禮拜日,於是諗住不如去下白泥,

這個地方都去過好幾次,不過都係同朋友,今次第一次帶對仔女去!

【呀劍萬帥facebook專頁 http://www.facebook.com/kimfamilytraveltips

因為太熱既關係同埋我哋一心諗住去睇日落,日落差唔多去到7點後,

所以我哋等到差唔多5點先起行!大家只要去到泰豐街搭33小巴,

當你見到流浮山回旋處即係話你已經就到,你會係車度望出去見到一個好似下白泥既地方,個度其實係上白泥,

如果你有好多時間可以先落車去逛逛,然後沿路行去下白泥,不過都好遠吓!

其實上白泥就冇咩好睇,小巴再行多5分鐘度你可以預先同司機講喺波叔鴨仔坑釣魚場或者好姐釣魚場度落車,跟住行番轉頭一陣間就見到下白泥!又或者你可以總站落車,個度係一個士多同鄉公所!

Shutter Speed | 1/600 s

Aperture | f/2.2

ISO/Film | 100

我哋係上斜坡位置落車,跟住爬石頭落去,有少少危險,我先拖住哥哥落去泥灘,

然後再抱起芊芊扶住老婆落去,我仲記得以前唔識嘢,老婆大住肚都扶佢上落呢個石地,諗起都起雞皮,

其實再前d有平地出入,即係釣魚場個邊,我哋都係周圍行下玩吓樹枝玩吓沙!

睇吓蟹仔同彈塗魚,其實好快就已經過咗成個鐘,

跟住差唔多去睇日落,不過今日就多雲,所以未日落都已經feel到唔對路冇嘢睇!

(我下次補番幾係我4年前係度影既日落相俾大家睇)

最後大家都沿住草中的小路離開,行到出去就見到有個地盤,個度有水喉俾人洗腳,

因為你行完個泥灘多數都成腳泥,然後再出去就係2個釣魚場架啦,係好姐釣魚場個度有個33小巴站,

因為我哋太遲既關係所以條龍已經好長

(之後有2架車嚟都full哂,於是d人都開始行去總站度排隊搭,因為只差一個站),

因為芊芊都要食飯,但係成7點幾都未有車,有點擔心!

係呢個時侯發現我部電話仲收到,Smartone你太偉大啦,

於是我係好姐釣魚場度見到個Call的電話,就試吓!

果然黃天不負有心人,打咗2次終於有司機肯入嚟!

其實我諗你只要講雙倍價錢都一樣會有司機入嚟(因為在大埔小白鷺的經驗), 

最後排緊長龍既朋友們好羡慕咁望住我哋離開了!

Photo by CANON 5D Mark III, Len | EF 35mm f/1.4L USM

呀劍評分: 9分

呀劍評語: 好靚!即使睇唔到日落,係度睇到泥地一棵棵小樹苗,小蟹仔,彈塗魚,小朋友都會好開心,始終呢度好大部分都好天然,所以真係值得一去


呀劍貼士: 

1/ 首先記住check日落時間。

2/ 廁所就冇喇, 自己帶定個樽俾小朋友行埋一邊去啦,如果唔係就要行番去釣魚場個度借廁所用!

3/ 大家記住帶定水毛巾,仲有記住著水鞋,千祈唔好著靚鞋,一定報銷!

4/ 仲有帶定膠布慎防佢哋撞親,始終多上落都係石頭地!

5/ 仲有提醒各位,如果你哋唔係駕車人士就真係要預早少少日落未落哂就好開始行,如果唔係等好多班車都未到你,仲有要留意個電話收唔收到,如果收到都可以試吓call的(可問釣魚場),但係的士都未必肯入嚟!執生。不過唔駛驚唔會出唔到去,最多等多1﹣2班車囉

 

下白泥簡介

下白泥位於香港新界西北的元朗流浮山,可算是在香港觀賞日落的最佳位置!

 

地址

元朗流浮山

 

交通

從泰豐街坐33專線小巴,過了流浮山迴旋處,大約再搭多10分鐘於鴨仔坑下車(如果唔知邊度就同司機講波叔或好姐釣魚場落)


(以上資料更新至文章當日)

 —————————————————————-
網誌全文 http://kimfamilytravel.blogspot.hk

fb專頁 https://www.facebook.com/kimfamilytraveltips
—————————————————————-

 

熱門文章

天降粟米擊傷女嬰 警DNA尋兇拘老婦
07-03
網絡熱話|28歲港大畢業女啃老度日 父母死心貼錢供報興趣班
07-03
母子食物中毒母暈厥 8歲子忍痛跌撞找鄰居求救獲讚
07-02
暹芭襲港|8號風球下茶餐廳加$5惹爭議 網民:做人最緊要懂得將心比心
07-02
鍾嘉欣着紫色泳裝下水 叫網民估第三胎性別
07-03