【呀劍萬帥】父母拍攝孩子的小貼士
2016-04-27
「唔好郁!」「望住呢度!」「嗱, 快D呀, 好多人等緊架!」
係咪好多時同小朋友影相都會有咁既對白呢!
雖然我唔算係咩攝影達人,
不過多年跟自己兒女影相, 都會有一些心得,
可以跟大家分享一下
【呀劍萬帥facebook專頁 http://www.facebook.com/kimfamilytraveltips】
1/ 攪笑影 ‧ 仲開心
小朋友唔望鏡頭點算好? 好多時同小朋友影相,尤其是爸爸,當佢唔聽話係都唔望住你個鏡頭嘅時侯,你都會話佢,然後攪到最後兩敗俱傷,本來一件開心事變得唔太開心!
BB嘅時侯我哋就可以用鎖匙,用聲音嚟引佢啫,咁如果三四五歲,點樣叫到佢望實鏡頭(仲要笑住個隻)呀!? 其實大家首先要確定一件事,就係攝影係一件快樂事,希望拍下與寶貝的開心時刻,所以無論佢望唔望鏡頭,最重要係相中有他!
所以我覺得可以叫佢嘗試扮鬼臉,或者跳起等動作,讓他覺得被攝是一件開心快樂的事,至少他下次還會再入鏡,若每一次因為要他望鏡而令他不快,他只會連入鏡也不願意!
2/ 隨意影 ‧ 仲自然
小朋友走嚟走去企唔定! 其實相機係用嚟捕捉小朋友最真既一面, 並非反而係限制咗佢哋既活動, 企定定只係影證件相先要架啫! (當然我講緊極端例子, 我有陣時都會要求孩子望鏡頭影相的)
其實大家都係怕佢哋走嚟走去, 影唔到佢哋個樣啫, 講真依家已經唔係菲林機既年代, 大家應該可以放心亂咁影, 仲會影到佢哋個樣既!
如果怕技術唔夠, 等我教教大家, 只要調交番個快門去到1/500 或以上, 帶番支光圈夠大的鏡頭, 影室內就應該冇咩問題(室外日光時間就更加冇問題), 佢哋唔係跑9.9, 唔係真係咁難影既!
3/ 有咋嗱 ‧ 仲易影
其實小朋友同大人一樣, 影相嗰陣對手唔知放喺邊, 如果有D道具當玩具俾佢哋揸住, 佢哋會更願意入鏡影相!
好似同佢哋玩吹Bubble, 等佢哋邊玩邊影!
有支國旗仔俾佢哋揸住, 正所謂「有咩依郁, 揸住碌竹!」
去行山一定要俾佢搵枝樹枝揸住!
4/ 蹲下來 ‧ 仲新鮮
影嚟影去都係咁? 其實因為你只係從自己既身高角度影過去, 所以你會發現影小朋友既相, 好似差唔多咁! 其實試吓蹲下來嘗試像一個小朋友咁去睇你哋既孩子, 可能會有驚喜同埋新發現!
原來這千秋的繩子是這麼長
這個角度你可清楚看見小孩正在跟別人是如何溝通
妹妹原來看見大鯉魚時是這樣的表情
我在下拍下 她仰望上面吹出來的Bubble
5/ 有背景 ‧ 仲靚D
好多時我哋只顧影自己的孩子, 往往會疏忽身後的背景構圖等問題, 如果你做足以上四點想再錦上添花, 咁就要照顧埋孩子身後的環境, 才會影出神級的親子相!
其他貼士
1. 多用連拍
抱住「食得唔好嘥」既精神, 不斷狂影, 唔好影得唔滿意又要即時delete番張相(尤其處女座朋友), 當你望吓自己影得好唔好既時侯, Good Timing 已經拜拜喇!
2. 備大光圈鏡
如果唔想帶閃燈出街, 咁就真係要帶大光圈鏡, 尤其你又唔知自己嗰日會去邊, 去咗室內又冇閃就係咁先 (當然機靚的話可以推高ISO添)
3. 增強快門
正如我頭先所謂, 小朋友既速度係超乎你想像, 雖冇9秒9, 但都有9秒8, 所以標準SET定300-500或以上都差唔多!
最後秘技
如果上述所講的, 你都做唔到或覺得有難度, 最後秘殺技就係唔好理咁多, 最緊要記住一點, 「影相係幫助你同小朋友記錄快樂開心時刻!」 影唔影得滿意唔緊要, 最緊要小朋友開心!
或者 搵我影! (我收好平)
—————————————————————-
網誌全文 http://kimfamilytravel.blogspot.hk
fb專頁 https://www.facebook.com/kimfamilytraveltips
—————————————————————-