【小小豬廚房】鮮百合淮山雪梨瘦肉湯

依排啲天氣真令人好沮喪，因為我地三口子相繼都病左，胃口都冇乜，真係食粥咁多餐。平平淡淡左咁多日，終於大家都有返啲食量，所以就煲個潤而不燥嘅鮮百合淮山雪梨瘦肉湯等我地三口子都潤一潤啦！

鮮淮山同鮮百合都唔難買，依家好多街市菜檔都可以買到。鮮淮山可以健脾開胃之餘又有助益氣養陰，而鮮百合就有助潤肺止咳，清心安神功效，所以依個湯都係清清地，幾啱剛剛咳完嘅我地三口子飲呀！

材料包括有鮮淮山一條、鮮百合三球、雪梨四個、粟米一枝、紅蘿蔔一條、陳皮兩片、南北杏一湯匙及豬肉眼$40~

基本上煲依個湯都唔難，最麻煩嘅就一定係洗鮮淮山嘅過程，由於鮮淮山係帶有黏液，所以係刨皮時一定要戴上手套，避免啲黏液令手部痕癢。我之前就係試過掂到啲黏液，真係痕足一整晚~

去皮後嘅鮮淮山切塊備用~

瘦肉洗淨汆水，南北杏洗淨，果皮浸透去囊，紅蘿蔔及粟米去皮切塊~

鮮百合切去頭尾啡黑色部分，逐塊剝開洗淨，雪梨洗淨後去芯切四瓣~