小一入學│成功填交小一表格前 必須知道申請小學之「四個迷思」 │趙榮德
2021-09-22
讀到報章報道關於家長表達誠意，一大清早到小學排隊，我突然醒覺要提點家長交自行分配表格要留意的事項及填表須知，請家長填表格或交表格，細讀以下文章，免掛一漏萬，費時失事，影響子女前途。
以下為一般家長對小學自行分配學位執着的迷思：
1.收生靠「誠意」
事實：不是，自行配階段收純講「世襲」與「分數高低」及「運氣」，不講「誠意」；誠意在「叩門」才有用，因為校長在自行分配差不多完全「置身事外」，他不會攞啲表格去計分，寫字樓的文員或書記幫佢做「粗重嘢」，甚至同分要抽簽都喺教育局做，所以你早交遲交，校長唔知，收表格嗰個又話唔到事，話事嗰個係ED(教育局)，所以收生唔講誠意。
2.早交好過遲
事實：好似呢次早到第一日(9月20)，遲到最後嗰日(9月27日)都唔好，因為太早交， 可能未Check 清楚，到遲發覺填少咗或填錯咗便救唔番。太遲亦都唔好，因為最後嗰日交，發覺有些證件無帶齊，學校又趕在5分鐘後結束收表格，嗰陣時真係神仙難救。
3.小一入學申請編號有用
事實：在表格左上角那9個數目字的申請編號，被不少家長誤以為一. 愈細，選擇機會愈大；二.是用來抽簽的數字。
事實：那9個數目字的申請編號，只是表格的編號，與自行分配派位，完全無關係。所以家長不用提早趕去民政署等搶領表格。
4.叫有權力或有影力的人推薦書有用
事實：所謂有權力，是指對學校有影響力的人，而有影響力的人士，其實社會知名人士，對校長是無影響力的，除非是教育局任職的，但在教育局任職的是「知書識禮」之士，一定不會幫你寫推薦書的。至於前者有權力的人，最有權力影響校長的當然是校監，其次是校務委員會包括校董、舊生會主席、家長會主席等。無論怎樣有權力，都要在適當日子寫去學校，而適當日子是六月放榜前、叩門前一兩日，因為嗰陣時校長才有權收生，唔講你唔知，小學校長好多由九月到六月叩門前都無權收自己鍾意收嘅學生，因為喺嗰段時間，小學收生權力，完全放在教育局手中；如果你叫有權力人士寫信，一定在石沉大海，你焦急都無用，因為如果校長都無權喺嗰段時間收生，你叫校監、甚至校董逼佢收，佢手上一個學位都無，點樣俾你呢。所以記住，就算你叫有權力人士寫推薦信，記得喺六月先至寄，否則失敗自誤！
以上同家長分享了4個填表升學之迷思，如果還有甚麼疑難雜症，可text去我Facebook page (本人Facebook page 叫 趙Sir之友)。
祝各位家長成功替子女揀一間心儀小學！
作者：趙榮德
星島日報圖片
其他閱讀：