林子博太太逝世一周年 寫下心聲悼亡妻:你可以放心,我頂得住!

2021-10-21


今天是林子博亡妻董燕君(Shirley)逝世一周年的日子,他在個人社交平台上悼念亡妻,寫下這一年以來的心路歷程,其中訴說「俾人鬧我抽死鬼老婆水」、離開香港帶着子女移民的經歷,字裏行間流露着對亡妻思念之情。

Shirley在2019年確診罕見癌症「平滑肌肉瘤(腹腔)」第四期,一直堅強地進行化療及鏢靶治療,惟最終亦不敵癌魔,於去年10月21日逝世,留下丈夫林子博及一對子女。在過去這一年,林子博做了人生一個重大的決定——帶着子女移民英國,希望可以過新生活,可以卻遇到重重困難,令他心力交瘁。

閱讀更多:移民|林子博帶子女移居英國波折重重 開網上頻道分享生活難題

適逢今天是亡妻逝世一周年的日子,林子博凌晨在Facebook剖白對亡妻的思念,並訴說過去一年所面對的問題,令他有窒息的感覺。林子博指,在他壓力大的時候,知道應該要找朋友聊聊天,但卻又怕「放負」,影響他人;他以為傳媒主動問他心情時,是他唯一可以「釋放體內瘀血的途徑」,但最後發現依舊行不通,因為「會俾人鬧我抽死鬼老婆水」,因此只可以在Facebook上宣洩一下,告訴亡妻如今與孩子的生活點滴。

林子博表示,在亡妻死後,竟然有親戚著他找第二春,「黐線咩!我連諗都唔敢諗呀?前世未俾人鬧過咩?」,但他卻希望亡妻可以報夢,罵一罵他,「原來冇得再聽你鬧吓,間房會好靜」。

他續寫道:「老婆,你可以放心!我頂得住喎!你不嬲都知我硬淨嘅!望住屋企嗰兩隻大寶貝,就會變得冇嘢可以難到我!」又謂亡妻從前很想去外國讀書,如今他帶着子女到英國讀書,「你對子女做到喇,我肯定你會當自己做到一樣」。最後,林子博更表示10月21日,是他人生最痛苦的日子:「老婆,你究竟生前俾咗啲乜嘢我食?都成一年啦!點解我仲會咁掛住你?」字字情真,令人動容。

全文如下:

老婆,今日係你離開我剛剛一年。過去我哋面對嘅所有嘢,諗返轉頭呢啲過程都有窒息嘅感覺!我鬼唔知搵朋友傾可以減壓咩?但冇咩都唔好「放負」俾啲Friends啦!但係谷谷埋埋自己又唔舒服喎,所以傳媒朋友主動問我,就變成唯一可以釋放我體內瘀血嘅途徑!

但原來呢個方法係唔Work㗎!會俾人鬧我抽死鬼老婆水(係呀!即係你囉!)咁我就唯有喺自己社交平台Tag你個Facebook宣洩吓,話你知我哋而家嘅生活過成點?(唔知得唔得㗎?但都希望你會睇到啦!)

不過,有時又避免唔到關心我哋嘅媒體朋友,會轉載我社交平台啲Post報道出嚟!

唉!所以最終~都係又俾人鬧!

老婆,你知唔知我而家已經變成喺自己社交平台,自言自語咁同你傾計嘅自由都冇!

你就好啦!合埋眼乜都唔知走咗去,留返我一個人,帶住對子女繼續捱世界!

話你知,你走咗呢一年,竟然有親戚夠膽死叫我搵返個人?黐線咩!我連諗都唔敢諗呀?前世未俾人鬧過咩?不過如果你報夢嚟鬧吓我又唔拘喎!原來冇得再聽你鬧吓,間房會好靜!

老婆,你可以放心!我頂得住喎!你不嬲都知我硬淨嘅!望住屋企嗰兩隻大寶貝,就會變得冇嘢可以難到我!

你成日話自己以前細個好想去外國讀書,而家你對子女做到喇!我肯定你會當自己做到一樣。

最後,我想講嘅係:你知唔知我好怕面對10月21日?因為呢一日,係我人生最痛苦嘅日子。

老婆~你究竟生前俾咗啲乜嘢我食?都成一年啦!點解我仲會咁掛住你嘅?

我真係有好多好多嘢想同你講,呢首歌係我過去一年嘅心聲,希望你喺上面可以聽到啦!

愛你!

 

來源:林子博-我們這一家

更多文章:

已捐贈亡妻眼角膜及傷健用品 林子博為太太延續愛與情操

熱門文章

方媛分享女兒功課疑揭母女「約法三章」 郭富城堅持與妻女以廣東話交流
03-07
女子帶遇車禍、終生不能自理前夫改嫁 現任丈夫分擔照顧 餵飯、幫忙洗澡無怨無悔
03-07
病房陪愛兒3日直至去世 媽媽傷心辦喪禮 突然收到兒子訊息 結局超荒謬
03-06
唔怕改壞名︱2024 香港熱門中英文名字 榜首原來係呢個名...
03-08
天瑜腸道蠕動失調 暫時只能注射葡萄糖水 爸爸歷55次電療 癌指數已回復正常水平
03-08

非常爸抱怨小學兒子「 功課 太多」 滋擾恐嚇校長 1小時狂打電話18次 最終被捕
2024-03-28
知識改變命運 ? 私補30位學生僅一位基層生入大學 博士生慨嘆:一個好無奈嘅事實
2024-03-28
《中年好聲音》37歲支嚳儀4歲仔仔畫花牆  要兒子自己收拾殘局學承擔 幸與老公理念一致
2024-03-28
美國佛羅里達州禁14歲以下兒童開社交媒體賬號 全美最嚴厲法案
2024-03-27
輔助生育開支扣稅擬下年度實施 政府提醒申請人需保留收據等文件
2024-03-27
新一期《親子王》7-11及OK便利店有售!即睇更多升學教育、教養溝通資訊
2024-03-27
查看更多   ▸