兒童安全｜將軍澳男童落公園玩 遭9歲童擸刀片插頭爆缸 嚇親街坊

一名男童日前於將軍澳的公園玩耍期間，遭一名年約9歲的男童用一支插有細刀片的自製長棒插頭，當場血流如注，需要送院治理。涉事男童的姨媽事後在fb群組發文，指對方的母親雖親自道歉及稱願意賠償，但男童竟毫無悔意，更全程「睥住佢阿媽」，事件更令姪兒擔心出入安全問題。

網民黃小姐昨日（3日）在facebook群組「將軍澳主場」發帖，指其姪兒在將軍澳一個屋苑的公園與數名小朋友在草地玩耍，其間一名年約9歲的男童拿住一支棒頭插有一塊細刀片的自製長棒，突然插向姪兒頭部，之後連講4次「冇事」便離開。

黃小姐表示，姪兒被傷後，立即血流如注，上衣亦滿佈血迹，觸目驚心，需要即時送院治療，而男童母親得知事件後亦親身道歉及表示願意賠償，不過期間，涉嫌傷人的男童全程「睥住佢媽」，毫無悔意。

事後，黃小姐曾聯絡該屋苑的管理處，但對方稱屋苑的閉路電話未能拍攝到事發過程，亦以私隱為由不能代為聯絡那對母子的業主，「真係好無奈又好嬲，今次傷頭，下次傷到其他小朋友條頸咁點算？佢之前已經有前科，我小朋友話見過佢拎火酒同火機喺樓下玩，而家搞到我小朋友出入都好驚」。據知，男童的家人已就事件報警處理，數日後會落口供。

事件引來一眾網民留言，認為涉事男童毫無悔意，日後可能會再發生同類事件，傷及其他小朋友，「呢啲行為係唔應該縱容」、「可憐受傷的小朋友，必定留下陰影」、「一定要追究到底」。

來源：將軍澳主場fb

獲頭條日報授權轉載