新冠疫情 | 林子博在英確診新冠肺炎稱已打疫苗 連續3日發燒至39度
2022-01-10
已移民英國曼城的林子博，今日於YouTube頻道上傳新片及於facebook公佈自己確診新冠肺炎，而他認為病情不算嚴重，相信可能是染上變種病毒Omicron。林子博於facebook上載快速測試結果及探熱發燒至39度的照片，並表示：「中咗！冇咳、冇鼻水、冇喉嚨痛、有味覺、唞氣正常。連續三日燒到39（度）、發冷同周身骨痛！」不少網民都留言祝他早日康復，同時關心與他同住的子女健康。
同日林子博於YouTube頻道上傳新片講述染疫詳情，他稱近日並冇周圍去，唔知點解會中招，這幾天突然感到唔舒服，第一時間都有叫子女在家亦需戴上口罩。林子博表示：「呢幾日我Keep住發燒，燒到39度，連續3日都係，Keep住發冷。即係當我食咗藥，我可以頂到6個鐘，6個鐘之後我又會發冷。」另外亦有少少頭痛、流鼻水、咳嗽，而發燒情況今日有好轉，更即場探熱，結果為37.5度。
現時他採取自我隔離方式，並通知英國的國民保健署，雖然唔使好似香港咁強制到政府安排的地方隔離，可方便他照顧兩名子女。但林子博坦言：「某程度上我都係擔心佢哋會中招，嚟緊佢哋會唔會發病真係唔知，希望唔會啦！」他稱家中有兩間房，現在自己睡一間房自我隔離。
而林子博亦因為中招，於是回想這十幾天到過甚麼地方及見過甚麼人，他亦有致電見過面的友人詢問對方身體狀況，而除夕見的朋友都未有確診。他稱：「我除夕後冇乜點出去，我冇同朋友開Party、冇聚會。我只係車細路返學放學、去超市買嘢、去入油……呢啲我全程都有戴口罩，除咗揸車冇戴口罩，我撳底車窗同落車都有戴口罩。」
他懷疑最有機會在超市被傳染，稱可能產品包裝有病毒，亦有可能是子女在學校群體因聚集而被傳染，因為子女放學上他的車時，他沒有戴上口罩。不過林子博亦大讚兒子醒目，上學第一日發現全班只有他一人戴口罩，於是提出一家應接種疫苗，而全家亦聽從兒子的意願一同接種疫苗，而兒子亦沒有在學校用餐，減輕受感染風險。林子博稱聽聞Omicron在小孩身上病徵不明顯，而子女暫時未有受感染病徵，還需繼續觀察。
頭條日報授權轉載
其他閱讀：
